سوال: اس بات کی تصدیق فرمادیں: حضرت علی کرم اللہ وجہہ فرماتے ہیں: جو شخص شب قدر میں سورۃ القدر پڑھتا ہے، اللہ اسے ہر بلا سے محفوظ فرما دیتا ہے، اور ستر ہزار فرشتے اس کے لیے جنت کی دعا کرتے ہیں، اور جو کوئی شخص نماز جمعہ سے پہلے تین مرتبہ سورۃ القدر پڑھتا ہے تو اللہ عزوجل اس روز کے تمام نماز پڑھنے والوں کے برابر نیکیاں لکھ دیتا ہے۔ (نزھۃ المجالس، ج1، ص223)

جواب: : سوال میں ذکرکردہ روایت’’شدید ضعیف‘‘ ہے،لہذا اس روایت کو بیان کرنا اور اسکی نسبت جناب رسول اللہ ﷺ کی طرف کرنادرست نہیں ہے۔
اس روایت کا ترجمہ،تخریج اور اسنادی حیثیت مندرجہ ذیل ہے:
ترجمہ :
حضرت علی رضی اللہ عنہ سے روایت ہے کہ جو کوئی شب قدر میں سوره قدر سات مرتبہ پڑھتا ہے، الله تعالی اسے ہر بلا سے محفوظ فرما دیتا ہے اور ستر ہزار فرشتے اس کے لیے جنت کی دعا کرتے ہیں، اور جو کوئی جمعہ کی نماز سے پہلے اسے تین مرتبہ پڑھے گا، اللہ تعالی اس کےلیے اس دن جمعے کی نماز پڑھنے والوں کی تعداد کے برابر نیکیاں لکھے گا۔ (نزھۃ المجالس:1/170، ط: المطبعه الكاستلية)(۱)
تخریج الحدیث:
۱۔اس روایت کو علامہ عبدالرحمن الصفوری (م 894ھ) نے’’ نزھۃ المجالس‘‘(1/170، ط: المطبعه الكاستلية)میں ذکر کیا ہے۔
۲۔ علامہ جلال الدین سیوطی ؒ (م 911ھ)نے ’’زیادات علی الموضوعات‘‘(1/136)،رقم الحدیث:154،ط:مکتبةالمعارف) میں ایک طویل روایت کے ضمن میں "جزء أبی منصور محمد بن عيسى بن عبد العزيز بن يزيد بن الصباح" (م 431ھ )کےحوالے سے ذکرکیا ہے۔
مذکورہ روایت کی اسنادی حیثیت:
علامہ ابن عراق الكنانی (م963ھ)نے اس روایت کو نقل کرنے کے بعد فرمایا: علامہ سیوطی ؒ (م 911ھ)نے اس روایت کی علت بیان نہیں کی اور اس روایت کی سند میں "محمدبن احمد بن ابراہیم ابوالطیب" ایک راوی ہے، اگر یہ وہی بغدادی، شافعی ہیں، جن کا تذکرہ لسان المیزان اور میزان الاعتدال میں ہے تو یہ مغرب چلے گئے تھے اور معتزلی بن گئے تھے، وہاں سے جلاوطن کیے گئے اور اگر یہ ابوالطیب کوئی اور راوی ہیں تو میں اس کو نہیں جانتا۔ا ان (ابوالطیب )سے نقل کرنے والے روای "محمد بن حمید الخزار" ہے، جو کہ ضعیف ہے، ان (محمد بن حمید الخزار) سے نقل کرنے والے راوی "الحسن بن علی بن زكريا بن صالح أبو سعيد العدوي"ہیں، جو کہ کذاب ہے۔اور ان سے نقل کرنے والے "محمد بن صدقة" ہے، جو مجہول ہے۔(۳)
اس تفصیل سے واضح ہوا کہ مذکورہ بالا روایت کے روات ضعیف اور مجہول ہیں اور محققین اہلِ علم کے نزدیک علامہ عبد الرحمن صفوری رحمہ اللہ کی کتاب "نزہۃ المجالس ومنتخب النفائس" میں بہت سی من گھڑت و غیرمعتبر اور اسرائیلی روایات ہیں، اس لیے جب تک دیگر محدثین سے اس کتاب میں ذکر کردہ روایات کی تائید نہ مل جائے، محض اس کتاب پر اعتماد کرکے ان روایات کو بیان کرنا درست نہیں ہے(۴)،اس لیے مذکورہ بالاروایت کو شدید ضعیف ہونے کی وجہ سے بیان کرنا اور اس کو آگے پھیلانا درست نہیں ہے۔