سوال: السلام علیکم، حضرات مفتیانِ کرام ! مجھے بادی بواسیرکی شدید تکلیف ہے، کچھ لوگوں نے اس کا علاج بتلایا ہے کہ چھپکلی کو مار کر اسے سرسوں کے تیل میں ڈال کر آگ پرجلائیں، پھر چھپکلی نکال کر پھینک دیں اور تیل ٹھنڈا ہونے پر متاثرہ جگہ پر دن میں تین بار لگائیں۔ کیا یہ علاج شرعا جائز ہے؟ اوراگر یہ تیل استعمال کیا جائے، تو وہ جگہ جہاں تیل لگایا گیا ہے، وہ پاک ہوگی یا نہیں؟ پاک نہ ہونےکی صورت میں پاک کرنےکا طریقہ کیا ہوگا؟ صابن سےدھونا ضروری ہے یا صرف پانی سے دھونے سے طہارت حاصل ہوجائے گی؟

جواب: واضح رہے کہ چھپکلی دو طرح کی ہوتی ہیں، کچھ چھپکلیاں چھوٹی ہوتی ہیں، جیسے عام طور پر گھروں میں رہنے والی چھپکلیاں، چونکہ ان میں بہنے والا خون نہیں ہوتا، اس لیے وہ ناپاک نہیں ہوتیں، لہٰذا اگر اس طرح کی کوئی چھوٹی چھپکلی مار کر اور تیل میں ڈال کر گرم کیا جائے تو اس سے وہ تیل ناپاک نہیں ہوگا، اگرچہ کھانے کے لیے حلال نہیں ہے، لہٰذا پاک ہونے کی وجہ سے علاج کے طور پر یا کسی اور مقصد کے لیے اس تیل کا صرف خارجی استعمال (external use ) کرسکتے ہیں، شرعاً کوئی حرج نہیں ہے۔
البتہ اگر بڑی چھپکلی ہو، جیسا کہ کھیتوں اور جنگلوں میں رہنے والی چھپکلیاں ہوتی ہیں، ان میں چونکہ بہنے والا خون ہوتا ہے، جو کہ ناپاک ہے، اس لیے اگر ایسی چھپکلی مارنے کے بعد تیل میں ڈال کر تیل گرم کیا جائے، تو وہ تیل ناپاک ہوجائے گا، اور ناپاک ہونے کی وجہ سے اس کا خارجی استعمال (external use) بھی جائز نہیں ہوگا، البتہ اگرمسلمان، ماہر ڈاکٹر یا تجربہ کار افراد یہ تجویز کریں کہ آپ کی اس بیماری کا علاج صرف اسی طرح ہی ممکن ہے، اس کے علاوہ کوئی اور متبادل پاک دوا یا علاج نہیں ہے، تو ایسی صورت میں یہ تیل بطورِ علاج متاثرہ جگہ استعمال کرنے کی گنجاش ہے، البتہ نماز وغیرہ کے لیے اس جگہ کو پاک کرنا ضروری ہوگا، اور پاک کرنے کے لیے پانی سے دھولینا کافی ہے، صابن وغیرہ سے دھونا ضروری نہیں ہے۔