سوال: مفتی صاحب ! ایک شخص کے چار بھائی اور دو بہنیں تھیں، جس میں سے تین بھائی اور ایک بہن کا انتقال ہو گیا ہے، اب یہ شخص اپنی زندگی میں اپنی جائیداد تقسیم کرنا چاہتا ہے، اس کے ورثاء میں صرف ایک بھائی اور ایک بہن ہے، بیوی، بچے اور والدین نہیں ہیں، اس کی جائیداد شرعی ورثاء میں کس طرح تقسیم ہوگی؟ نیز کیا یہ ساری جائیداد مسجد یا مدرسے میں دے سکتا ہے یا وصیت کرسکتا ہے؟ براہ کرم رہنمائی فرمادیں۔

جواب: انسان کو اپنی زندگی میں اپنی مملوکہ جائیداد میں تصرف کا مکمل اختیار حاصل ہے، وہ اپنی جائیداد میں سے جس قدر جس کو مناسب سمجھے دے سکتا ہے اور جس قدر اپنے لیے روکنا چاہے یا مسجد و مدرسہ میں دینا چاہے، دے سکتا ہے، اسی طرح اگر ورثہ کو محروم کرنا مقصود نہ ہو، اور وہ حاجتمند بھی نہ ہوں تو اپنی زندگی میں اپنی کل جائیداد بھی مسجد یا مدرسے میں دے سکتا ہے، اور اگر وہ چاہے تو اپنی کل مملوکہ جائیداد کے ایک تہائی حصہ کی وصیت بھی کر سکتا ہے۔
صورت مسئولہ میں مذکورہ شخص کو یہ اختیار بھی حاصل ہے کہ وہ اپنی زندگی میں قانون میراث کے حساب سے بہن کو ایک تہائی اور بھائی کو دو تہائی حصہ دیدے یا بہن اور بھائی دونوں کو برابر حصہ دیدے۔