سوال: مفتی صاحب ! میرا سوال یہ ہے کہ اگر صبح کی نماز میں جہاں بھی جگہ مل جائے، نماز پڑھ لے، بعد فراغت نماز اسی مسجد میں کسی دوسری مناسب جگہ پر بیٹھے اور مسجد کی الماری سے قرآن پاک پڑھنے کے لیے اٹھائے، پھر نماز اشراق کی 4 رکعت پڑھ کے گھر جائے تو کیا اس کو مقبول حج عمرہ کا ثواب اللہ پاک عنایت کریں گے؟ شکریہ

جواب: واضح رہے کہ اشراق کی نماز کی "مخصوص فضیلت" جس کا ثواب ایک حج و عمرہ کے برابر بتایا گیا ہے، اس فضیلت کو حاصل کرنے کے لیے حدیث میں فجر کی نماز پڑھنے کے بعد سے لے کر اشراق پڑھنے تک اسی جگہ بیٹھنے کا جو ذکر ہے، اس سے مراد فجر کی نماز کے بعد سے اشراق کی نماز کے انتظار میں بیٹھے رہنا ہے، یعنی نمازی کو چاہیے کہ وہ فجر کی نماز کے بعد سے لے کر سورج نکلنے تک کسی اور کام میں مصروف نہ رہے، بلکہ وہیں بیٹھ کر اشراق کا انتظار کرے، اور اس دوران ذکر وعبادت میں مشغول رہے، اور یہ انتظار مسجد میں کہیں بھی کیا جا سکتا ہے، کیونکہ پوری مسجد ایک جگہ کے حکم میں ہے۔