سوال: اگر کوئی شخص برطانیہ جاتا ہے اور زیورات یا گھڑی بیچتا ہے، تاکہ زیادہ منافع حاصل کر سکے، لیکن وہاں جاتے ہوئے وہ برطانیہ کے قوانین کی خلاف ورزی کرتا ہے، جہاں آپ نے قیمتی اشیاء کے بارے میں بتانا ہوتا ہے٬ تو اس کے مطابق کسٹم چارج کیا جاتا ہے٬ وہ اس کو چھپا لیتا ہے یا وہ پکڑا جاتا ہے تو کسٹم چارج سے بچنے کیلئےکہتا ہے کہ یہ ذاتی استعمال کیلئے یا یہ پرانی گھڑی ہے۔
اس معاملے میں چونکہ وہ جھوٹ بولتا ہے یا کسی چیز کو چھپاتا لیتا ہے تو کیا اس کا نفع حلال ہوگا یا حرام ؟

جواب: کسٹم ڈیوٹی سے بچنے کیلئے کسی چیز کو چھپانا (جبکہ قانونی طور پر اس کے بارے میں بتانا ضروری ہو) یا تجارتی سامان (Trading Items) کو ذاتی استعمال کا سامان کہنا دھوکہ دہی٬ غلط بیانی اور جھوٹ پر مشتمل ہونے کی وجہ سے ناجائز ہے٬ اس سے اجتناب لازم ہے۔
البتہ اس سامان کو جائز طریقے سے فروخت کرنے سے جو نفع حاصل ہو٬ تو محض کسٹم پر جھوٹ بولنے یا قانون کی خلاف ورزی کی وجہ سے خرید و فروخت کے نتیجے میں حاصل ہونے والے نفع کو حرام نہیں کہا جائے گا٬ بلکہ نفع حلال ہوگا، بشرطیکہ اس کے حرام ہونے کی کوئی اور وجہ نہ پائی جائے، لیکن ملکی جائز قوانین کی خلاف ورزی٬ دھوکہ دہی٬ غلط بیانی اور جھوٹ بولنے کا گناہ اپنی جگہ باقی رہے گا٬ اس سے لئے اس عمل سے اجتناب کرنا لازم ہے۔