سوال: محترم جناب مفتی صاحب! السلام عليكم،
میرے ایک دوست نے بچے کی پیدائش کے موقع پر منت مانی کہ اگر بیٹا پیدا ہوا تو وہ اس کو حافظ بنائیں گے۔
الحمد للہ بیٹا پیدا ہوا، بعد میں پاکستان سے باہر نوکری کے سلسلے میں بمعہ فیملی چلے گئے، وہاں کچھ حفظ کے مدارس کی کمی، دیگر مصروفیت کی وجہ سے بے توجہی اور عصری تعلیم کی اہمیت کے ماحول سے متاثر ہو کر منت پوری نہ کرسکے۔ اب اسکا کفارہ کیا ہے؟ بیٹا اب بڑا ہو کر عملی زندگی میں قدم رکھ چکا ہے، مگر مشکلات پیش آ رہی ہیں، وہ صاحب پشیمان ہیں کہ منت پوری نہ ہونے کی وجہ سے بے برکتی ہے، بیٹے پر اس کے اثرات ہیں، لہذا کفارہ ادا کرنا چاہتے ہیں۔
براہ کرم جواب دیکر مشکور فرمائیں۔ والسلام

جواب: واضح رہے کہ نذر و منت صحیح ہونے کے لیے ضروری ہے کہ جس عمل کی نذر مانی گئی ہو، وہ کسی فرض یا واجب عمل کی جنس سے ہو، اسی طرح وہ عبادتِ مقصودہ بھی ہو، جیسے: نماز، روزہ، حج، قربانی وغیرہ، لہذا سوال میں ذکر کردہ صورت میں نذر منعقد نہیں ہوئی، کیونکہ بیٹے کو حافظِ قرآن بنانا فرض یا واجب نہیں ہے، اس لیے یہ نذر شرعاً لازم ہی نہیں ہوئی، اور جب نذر لازم ہی نہیں ہوئی، تو سائل اگر اپنے بیٹے کو حافظ قرآن نہ بنا سکا، تو گناہ گار نہیں ہوگا۔