سوال: مفتی صاحب ! کیا میں اپنی بیوی کی بیٹی کے لیے ایک تہائی کی وصیت کر سکتا ہوں؟ اور اگر میں نے وصیت نہیں کی تو کیا میرے مرنے کے بعد میرے وارث اس بچی کو اپنی رضامندی سے میری میراث میں سے کچھ دے سکتے ہیں؟
یا اگر میں اس بچی کے لیے 30 فیصد کی وصیت کر جاؤں تو میرے دوسرے وارثوں کے لیے 70 فیصد بچے گا، تو اس میں کوئی گناہ کی بات تو نہیں ہے؟ نیز کیا اس بچی کے لیے وصیت کرنے کے لیے دیگر وارثوں کو بھی اعتماد میں لینا ہوگا؟

جواب: 1) واضح رہے کہ سوتیلے باپ کی میراث میں سوتیلی بیٹی کا حصہ نہیں ہوتا ہے، لہذا وارث نہ ہونے کی وجہ سے سوتیلی بیٹی کے لیے ایک تہائی مال میں وصیت کی جاسکتی ہے اور یہ وصیت موصی ( وصیت کرنے والے) کے مرنے کے بعد نافذ ہوگی۔
2) اگر سوتیلا باپ اپنی سوتیلی بیٹی کے لیے زندگی میں وصیت نہ کرسکے تو باپ کے مرنے کے بعد تمام عاقل بالغ ورثاء یا ان میں سے بعض اگر اپنے حصہ میں سے میت کی سوتیلی بیٹی کو اپنی رضامندی سے کچھ دینا چاہیں، تو دے سکتے ہیں۔
3) وصیت پر دو مردوں یا ایک مرد اور دو عورتوں کو گواہ بنانا مستحب ہے، لہذا اپنی سوتیلی بیٹی کے لیے وصیت کے بارے میں اپنی اولاد کو مطلع کردیں، تاکہ بعد میں اختلاف کی وجہ سے کسی کی حق تلفی نہ ہو۔