سوال: وضو کے درمیان کی دعا باتھ روم میں کیسے پڑھیں؟ نیز مسنون دعا بھی بتادیں۔

جواب: واضح رہے کہ ذکر اللہ کی تعظیم کا تقاضا یہ ہے کہ ان کو پاک اور صاف جگہوں میں کیا جائے، گندگی اور ناپاک جگہوں میں نہ کیا جائے، چونکہ صرف لیٹرین محل نجاست ہے، اس لیے اس میں ذکر اور مسنون دعائیں پڑھنے سے احتراز کرنا چاہیے، البتہ اگر لیٹرین اور غسل خانہ ایک ساتھ ہوں، لیکن دونوں جگہوں کی سطح میں فرق ہو، ایک اونچی اور دوسری نیچی ہو، اور لیٹرین میں بظاھر کوئی نجاست موجود نہ ہو تو غسل خانہ میں وضو کرتے ہوئے وضو کی مسنون دعا پڑھنا جائز ہے۔
وضو کے درمیان درج ذیل دعا کا پڑھنا حدیث سے ثابت ہے:"اَللّٰھُمَّ اغْفِرْلِیْ ذَنْبِی وَوَسِّعْ لِیْ فِیْ دَارِیْ وَبَارِکْ لِیْ فِیْ رِزْقِیْ"(الاذکار للنووی، حدیث نمبر: 66)
ترجمہ: اے اللہ! میرے گناہ بخش دے اور میرے گھر میں وسعت عطا فرمااور میری روزی میں برکت عطا فرما۔