سوال: صدقہ میں بکرا دینے کا کوئی شرعی پہلو ہے یا یہ بدعت میں آتا ہے؟

جواب: عوام میں صدقہ کے بارے میں مشہور ہے کہ بکرا ہی صدقہ میں دیا جائے تو صدقہ ادا ہوتا ہے اور خاص طور پر کالا بکرا دینے سے بلائیں دور ہوتی ہیں اور یہ جان کے بدلے جان کا صدقہ ہے۔
واضح رہے کہ شریعت میں ان باتوں کا کوئی تصور موجود نہیں ہے، بلکہ یہ ہندوؤں کے اثرات اور ان کی تعلیمات کا نتیجہ ہے۔
شریعت میں صدقہ کا تصور یہ ہے کہ اللہ کی رضا کی خاطر اپنی مصیبتوں اور برائیوں کو ٹالنے یا کسی نعمت کے شکرانے کی خاطر کوئی چیز کسی کو دیکر اس کی ضرورت کو پورا کرنا، اب اگر اس کی ضرورت گوشت کی ہو تو اسے گوشت دیا جا سکتا ہے اور اگر اسے چاول، آٹا، چینی، لحاف، بستر یا رقم کی ضرورت ہو تو اسے یہ اشیاء دے کر اس کی ضرورت کو پورا کیا جائے تو یہ بھی صدقہ ہی کہلائے گا۔
دیکھا یہ گیا ہے کہ فقیر کی بنیادی ضرورت پوری نہیں ہورہی ہوتی اور اسے بکرے کا گوشت دیا جارہا ہوتا ہے، اس گوشت کے بجائے اگر اس کو رقم یا راشن دے دیا جائے تو کئی دن وہ اس سے اپنے گھر کا خرچ چلا سکتا ہے، لہذا معلوم ہوا کہ شریعت میں صرف عیدالاضحی کے موقع پر قربانی اور خون بہانے کا تصور ہے، اس کے علاوہ خون بہانے کا تصور اسلام میں نہیں ہے، بلکہ ضرورت اور احتیاج کو پورا کرنے کا تصور اسلام میں ہے، جس کو ہم صدقات کے ذریعے پورا کرسکتے ہیں۔