سوال: السلام علیکم، مفتی صاحب ! سوال یہ ہے کہ چوتھے کلمہ میں لفظ ابدا ابدا ذالجلال والاکرام پڑھنا کیسا ہے؟ اس کے بارے میں رہنمائی فرمائیں۔جزاک اللہ خیرا

جواب: واضح رہے کہ بر صغیر کے عوام میں رائج چھ کلمے اپنی اس ترتیب اور ان ناموں کے ساتھ قرآن و حدیث سے باقاعدہ طور پر ثابت نہیں ہیں، بلکہ یہاں کے علماء کرام نے عوام کے عربی سے ناواقفیت کی بنا پر، ان کی سہولت اور آسانی کے لیے چھ کلموں کو مرتب کیا ہے، تاکہ عوام الناس کے بنیادی عقائد درست ہوں، اور ان کے لیے ان کلموں کو یاد کر کے مختلف مواقع میں پڑھنا آسان ہو، چنانچہ ان کلمات میں سے بعض کلموں کے تو تمام الفاظ احادیث مبارکہ میں مکمل طور پر اسی ترتیب کے ساتھ موجود ہیں اور کچھ کے الفاظ متفرق طور پر مختلف احادیث مبارکہ میں پائے جاتے ہیں، انہی میں سے چوتھے کلمے کے جو الفاظ احادیث میں موجود ہیں، وہ درج ذیل ہیں:
مصنف عبد الرزاق میں چوتھے کلمے کے الفاظ ہیں:
’’ لا إلٰه إلا اللّٰه وحده لاشریك له، له الملك وله الحمد، یحیي ویمیت بیده الخیر وهو على کل شيءٍ قدیر‘‘.
(مصنف عبد الرزاق ،ج:۲،ص:۲۳۴،حدیث نمبر: ۳۱۹۲، المکتب الإسلامي، بیروت)
اور مصنف ابن ابی شیبہ میں " بیدہ الخیر" کے بعد "یحيي ویمیت" کا بھی اضافہ ہے۔
(مصنف ابن أبي شیبة، ج:۳، ص:۳۸۲، حدیث نمبر:۱۵۱۳۶، مکتبة الرشد، ریاض)
البتہ تلاش کے باوجود ہمیں حدیث کی کسی کتاب میں یہ الفاظ: " أبدا أبدا ذو الجلال والإكرام" نہیں ملے ہیں، لیکن جیسا کہ شروع میں ذکر کیا گیا ہے کہ یہ کلمات عوام الناس کو عقیدہ توحید و رسالت کو مختصر لفظوں میں یاد کرنے کے لیے مرتب کیے گئے ہیں، باقاعدہ یہ حدیث کے طور پر ثابت نہیں ہیں، جبکہ ان الفاظ: " أبدا أبدا ذو الجلال والإكرام" کا معنی بھی عقیدہ توحید کے مطابق ہے، تو اس لیے اگر چوتھے کلمے میں ان الفاظ کو شامل کر کے پڑھا اور یاد کیا جائے، تو کوئی مضائقہ نہیں ہے۔