سوال:
حضرت ! اون (on) پر گاڑی لینا جائز ہے یا نہیں؟

جواب: گاڑی کی خریداری کرتے وقت اگر گاہک گاڑی کا فوری قبضہ چاہتا ہو تو ایسی صورت میں مارکیٹ میں عموما گاڑی کی قیمت اس گاڑی کے بنسبت زیادہ ہوتی ہے، جو بکنگ کے کچھ عرصہ بعد وصول کی جائے۔ فوری طور پر گاڑی وصول کرنے کیلئے گاہک سے گاڑی کی عام قیمت سے جو اضافی رقم لی جاتی ہے٬ اسے "اون منی" (On money) کہا جاتا ہے اور اس معاملے کو "اون(On) پر گاڑی لینا" کہا جاتا ہے۔
شرعی اعتبار سے فروخت کرنے والے کو اختیار ہوتا ہے کہ وہ اپنی چیز کی کسی وجہ سے زیادہ یا کم قیمت لگائے اور گاہک کو اس قیمت کے مطابق چیز لینے یا نہ لینے کا اختیار ہوتا ہے، لہذا اگر گاہک کے ساتھ شروع میں طے کر لیا جائے کہ فوری پر گاڑی وصول کرنے کی صورت میں اون منی(On money) ملاکر اس کی قیمت اتنی ہوگی اور یہ قیمت اسی وقت باہمی رضامندی سے متعین کرکے طے کرلی جائے تو اس میں شرعا کوئی حرج نہیں ہے، بشرطیکہ گاڑی بیچنے والے کے قبضہ (Possession) میں آچکی ہو۔
اور اگر گاڑی خریدتے وقت یہ طے ہوا ہو کہ گاڑی فوری نہیں ملے گی، بلکہ کچھ عرصہ( مثلا: دو تین مہینے) بعد ملے گی٬ اس پر سودا طے ہوگیا٬ بعد میں مقررہ مدت سے پہلے گاڑی لینے کی وجہ سے اضافی رقم (On money) کا لین دین جائز نہیں ہوگا٬ اس سے اجتناب لازم ہے۔
واضح رہے کہ اگر گاڑی فروخت کرنے والا خود گاڑی کا مالک نہ ہو٬ بلکہ گاڑیوں والی کسی کمپنی کا صرف ڈیلر/ ایجنٹ ہو تو اس صورت میں گاہک سے "اون منی" (On money) لینے یا نہ لینے کے سلسلے میں وہ متعلقہ کمپنی کے ساتھ کیے گئے معاہدہ کا پابند ہوگا٬ چنانچہ اگر کمپنی کی طرف سے اپنے ڈیلر کو اون (On) لینے سے منع کیا گیا ہو تو ڈیلر پر اس معاہدہ کی پابندی شرعا بھی لازم ہوگی۔