سوال: کیا ایک بیوہ خاتون اپنے خاوند کی وفات کے بعد اس کی میراث میں 100 فیصد وراثت کا شرعی حق رکھتی ہے، جب کہ ان کی کوئی اولاد نہ ہو اور مرحوم کے فقط ایک بڑے بھائی ہوں، جن کی وفات مرحوم شوہر سے 4 سال پہلے ہوچکی ہو اور ان کا ایک بیٹا اور 5 بییٹیاں ہوں؟ نوٹ : مرحوم کے والدین مرحوم سے پہلے انتقال کرچکے ہیں۔ براہ کرم وضاحت فرمائیں۔

جواب: واضح رہے کہ اگر شوہر کا انتقال ہو جائے اور اس کی کوئی اولاد نہ ہو، تو شوہر کی میراث میں سے بیوی کو چوتھائی (1/4) حصہ ملتا ہے، اور اگر شوہر کی کوئی اولاد ہو، تو بیوی کو آٹھواں (1/8) حصہ ملتا ہے، اس کے بعد باقی میراث دیگر شرعی ورثاء میں تقسیم ہوتی ہے۔
پوچھی گئی صورت میں مرحوم شوہر کی تجہیز و تکفین کے جائز اور متوسط اخراجات، قرض کی ادائیگی اور اگر کسی غیر وارث کے لیے جائز وصیت کی ہو، تو ایک تہائی (1/3) میں وصیت نافذ کرنے کے بعد کل جائیداد منقولہ و غیر منقولہ کو چار حصوں میں تقسیم کیا جائے گا، جس میں سے بیوہ کو ایک (1) اور بھتیجے کو تین (3) حصے ملیں گے، بھتیجوں کے ہوتے ہوئے بھتیجیوں کو مرحوم چچا کی میراث میں سے کچھ نہیں ملے گا۔
اگر فیصد کے اعتبار سے تقسیم کریں، تو
بیوہ کو % 25 فیصد
بھتیجے کو % 75 فیصد ملے گا۔