سوال: مفتی صاحب ! کیا والدہ کے اصرار کرنے پر سالگرہ کا کیک کاٹنا جائز ہے یا ان کاموں میں شامل ہوگا، جن میں والدین کی اطاعت جائز نہیں ہے؟ اسی طرح موبائل سے انکے اصرار پر تصویر کھینچوانا جائز ہے؟ اگر جائز نہیں ہے، تو کن الفاظ میں ان کو منع کرنا چاہیے؟ براہ کرم ان باتوں میں میری رہنمائی فرمائیں۔

جواب: 1۔ سالگرہ منانا اور اس موقع پر کیک کاٹنا ایک فضول رسم ہے، جو کہ غیر مسلموں کی طرف سے آئی ہے، اس لئے اس رسم سے اجتناب کرنا چاہیے، اور والدہ کو بھی حکمت و مصلحت کے ساتھ منع کرنا چاہیے، لیکن سالگرہ کی دیگر خرافات سے بچتے ہوئے والدہ کے اصرار پر ان کا دل رکھنے کے لیے کیک کاٹنے کی گنجائش معلوم ہوتی ہے۔
2۔ موبائل سے (ڈیجیٹل) تصویر بنانا اگرچہ بہت سے علماء کرام کے نزدیک حرام اور ناجائز تصویر کے حکم میں داخل نہیں ہے، (بشرطیکہ وہ غیر محرم خواتین یا دیگر حرام مناظر کی تصویر نہ ہو) لیکن بلاضرورت مو بائل /ڈیجیٹل کیمرے سے تصویر لینا مناسب نہیں ہے، اس لئے اس سے بچنا چاہیے، اس حوالے سے والدہ کو حکمت و بصیرت کے ساتھ منع کرنا چاہیے، لیکن اگر کسی نے موبائل سے (غیر محرم خواتین اور حرام مناظر کے علاوہ کی) تصویر بنالی، اور اس کا پرنٹ وغیرہ نہ لیا جائے، تو اس میں گناہ نہیں ہوگا۔