سوال: ہم کسی منصوبے پر کام کرتے ہیں، سرکاری ہو یا غیر سرکاری ملازمین کے لیے ایک نگران مقرر ہوتا ہے، جو ملازمین کے کام اور اوقات کی (نگرانی، ذمہ دار ہوتا ہے) اور مہینہ کے آخر میں تنخواہیں شعبہ آمدن (فائنانس ڈیپارٹمنٹ) کے ذریعے ہم تک پہنچاتا ہے اور اس نگران کے اوپر اس کا کوئی نگران بھی مقرر ہوتا ہے، اسی طرح یہ سلسلہ اعلیٰ نگران تک ہوتا ہے۔
ملازمین کا دفتر دیر سے آنے اور مقررہ وقت سے پہلے جانے اور دفتری اوقات میں اپنے ذاتی کام وغیرہ کرنا یا بغیر اجازت کے غیر حاضر رہنا اسلامی نکتہ نظر سے ناجائز ہے۔
اب سوال یہ ہے ماضی میں اوپر مذکور اوقات کی جو تنخواہ لی ہے، اس کا ازالہ کس صورت میں ہوسکتا ہے؟
اگر ہم ان مذکورہ ماضی کے اوقات کی نشاندہی کرکے اپنے نگران کو زبانی یا کاغذی طور پر پیش کریں کہ اتنے اوقات پچھلے مہینوں کی غیر حاضر اور ذاتی کام میں خرچ ہوئے ہیں، جس کی ہم تنخواہ لے چکے ہیں، اس لیے ہماری آئندہ ماہ کی تنخواہ سے ماضی کے اوپر ذکر کردہ اوقات کی وجہ سے کٹوانا چاہتے ہیں، ان اوقات میں سے چند اوقات ماضی میں ہی نگران کی علم میں آچکے تھے اور کچھ ہماری طرف سے نشاندہی کرائی گئی، پھر بھی اگر نگران بغیر کسی لالچ وغیرہ کے آئندہ تنخواہ سے کٹوتی نہ کروائیں، بلکہ تنخواہ پوری ادا کروائے اور ادارے کی اور نگران کی طرف سے جو منصوبے کا کام ہمارے ذمے تھے، وہ بھی نقصان کیے بغیر پورا کیا ہو، اور کبھی کبھی نگران کے کہنے پر بغیر کسی معاوضے کے ضرورت کے وقت کچھ زیادہ وقت دے کر کام مکمل کیے ہوں، تو کیا اس طرح ہماری ماضی کے اوپر ذکر کردہ اوقات کی تنخواہ جائز اور حلال ہوگی؟
یا وہ پیسے نگران کے حوالہ کردے یا کن صورتوں میں نگران کے حوالہ کرسکتے ہیں؟
یا کسی غریب کو یا عوامی کام میں بغیر کسی اجر کے دے سکتے ہیں؟
یا دفتر کے لیے کوئی مجموعی کام کی چیز ( بجلی/گیس کا بل، کاغذ یا کچھ اور خرید کر دے سکتے ہیں) چونکہ منصوبے کے پیسوں سے ہی یہ چیزیں خریدتے ہیں اگر ہم خرید کر دینگے تو ان چیزوں کے لیے منصوبے کے اکاؤنٹ سے پیسے نکلوانے کی ضرورت نہیں ہوگی۔
اس طرح ہماری ماضی کی تنخواہ جائز اور حلال ہوگی؟
جزاک اللّہ

جواب: سوال میں ذکر کردہ صورت میں آپ نے جن اوقات یا ایام کی غیر قانونی تنخواہیں وصول کی ہیں، محض نگران کے معاف کرنے سے وہ رقم حلال نہیں ہوگی، بلکہ وہ رقم ادارے کو واپس کرنا ضروری ہے، اس رقم کی واپسی کا درست طریقہ یہ ہے کہ آپ اتنی تنخواہوں کے بقدر رقم ادارے میں جمع کرادیں، چاہے یہ رقم نقد کی صورت میں ہو یا آئندہ ماہانہ تنخواہوں سے کٹوتی کی صورت میں ہو۔
اسی طرح اگر آپ مذکورہ مقصد کے لیے ادارے کے ضروری اخراجات (مثلاً: بجلی، گیس وغیرہ کے بل کی ادائیگی) میں یہ رقم صرف کرنا چاہتے ہوں، تو اس کی بھی گنجائش ہے، البتہ اگر آپ اس کی تلافی مقررہ وقت سے اضافی کام (Over time) کرنے کی صورت میں کرنا چاہتے ہیں، تو اس میں ادارے کے اصول اور ضابطے کو دیکھا جائے گا، اگر کسی ادارے کے قواعد و ضوابط کے مطابق ان غیر قانونی وصول شدہ تنخواہوں کی تلافی کا مذکورہ بالا طریقہ رائج ہو، تو وہاں ایسا کرنا بھی جائز ہوگا۔