سوال: میرے بھانجے نے مجھ پر جھوٹی تهمت لگائی اور قرآن اٹھا کر قسم کھائی اور مجھ سے بھی کھلوائی اور یہ کہا کہ جھوٹے کا برا حشر ہو،
کیا جھوٹے پر واقعی عذاب نازل ہوگا اور سچے کی سچائی ثابت دنیا کے سامنے آئے گی؟ نیز جھوٹ اور قرآن اٹھانے کی کیا سزا جھوٹے کو ملے گی؟ براہ کرم رہنمائی فرمادیں۔

جواب: کسی مسلمان پر بہتان باندھنا، اور اس پر جھوٹی تہمت لگانا گناہ کبیرہ اور حرام ہے، ایسا کرنے پر قرآن وسنت میں سخت وعیدیں نازل ہوئی ہیں، سورۃ النور میں اللہ تعالیٰ نے ایسا کرنے والوں کو ملعون قرار دیا ہے، اور آخرت میں سخت عذاب کی وعید سنائی ہے، ارشاد باری تعالیٰ ہے:
"یاد رکھو کہ جو لوگ پاک دامن بھولی بھالی مسلمان عورتوں پر تہمت لگاتے ہیں، ان پر دنیا اور آخرت میں پھٹکار پڑچکی ہے، اور ان کو اس دن زبردست عذاب ہوگا" (سورۃ النور، رقم الآیۃ:23)
اسی طرح جھوٹی قسم کھانا مستقل گناہ کبیرہ ہے، اس طرح کی قسم کو شریعت میں "یمینِ غموس" کہتے ہیں کہ اس کا کھانے والا پورا کا پورا گناہ میں ڈھوب جاتا ہے۔
اسلام میں اگر کوئی شخص کسی پر تہمت لگانے کے بعد اسے گواہوں سے ثابت نہ کرسکے، تو اس پر قاضی "حدِ قذف" جاری کرتا ہے، اور آئندہ ایسے شخص کی گواہی قبول نہیں کی جاتی ہے۔