سوال: کیا یہ حدیث"عبدي لما جعلتني اهون الناظرين اليك استحييت من خلقي ولم تستحي مني" ترجمہ:میرے بندے تو نے مجھے اپنی طرف دیکھنے والوں میں سب سے چھوٹا بنادیا تو نے میری مخلوق سے تو شرم کی اور مجھ سے شرم نہ کی۔ حضور اکرم ﷺ سے ثابت ہے؟ برائے کرم حوالہ کے ساتھ رہنمائی فرمادیں۔

جواب: سوال میں مذکور کلمات تلاش کے باوجود بطورِ حدیث قدسی کسی حدیث کی مستند کتاب میں نہیں ملے ہیں، البتہ ابن جوزی رحمہ اللہ نے اس کے قریب قریب الفاظ کو اپنی کتاب "بستان الواعظین وریاض السامعین" میں بغیر کسی سند بصیغہ تمریض بطور روایت نقل کیا ہے، روایت کا مضمون اگرچہ قرآن وحدیث کے مفہوم کے موافق ہے اور سلف صالحین میں سے (واعظ) ابو الجلد رحمہ اللہ سے بھی اس کے مشابہ قول ملتا ہے، تاہم ہر درست بات کو بغیر کسی سند "حدیث" قرار دیا جانا درست نہیں ہے، سو ان کلمات کو بطور حدیث نقل کرنا درست نہیں۔
ابن جوزی رحمہ اللہ کی کتاب میں منقول کلمات کا ترجمہ درج ذیل ہے:
نبیﷺ سے روایت نقل کی گئی ہے کہ "روزِ قیامت اللہ تعالی اپنے بندے کو تنہائی میں کھڑا کرے گا، ایسے موقع پر وہ بغیر کسی حجاب سامنے ہوگا۔ اللہ تعالی اس کے گناہوں سے پردہ ہٹائیں گے، اور فرمائیں گے کہ تم نے فلاں دن یہ یہ عمل کیا، کیا تمہیں معلوم نہ تھا کہ میں تمہاری حرکات سے باخبر ہوں؟ اے بندے، کیا تم نے مجھے اپنی جانب دیکھنے والوں میں سب سے کم اہم سمجھا، کیا تمہیں مجھ سے حیاء نہیں آئی؟ میرے فرشتوں سے حیاء نہیں آئی؟ کیا میرے عذاب سے خوف نہیں آیا؟ میں نے تو تمہیں ٹھنڈے پانی سے سیراب کیا، تمہیں جسمانی مضبوطی اور مالی وسعت سے نوازا، پھر بھی تم نے میری نافرمانی کی راہ کو اختیار کیا۔ وہ بندہ شرم کی وجہ سے پسینے سے شرا بور ہوجائے گا، گویا گھبراہٹ سے موت واقع ہوجائے۔ پھر (ہمت کرکے سر اٹھاکر )کہے گا: اے میرے رب! جہنم کی آگ مجھ پر آپ کے اور مخلوق کے سامنے شرمندگی سے زیادہ آسان ہے (یعنی مجھے شرمندگی سے نجات دے کر جہنم میں ڈال دیں)۔
بندے کی بات سن کر حق تعالی شانہ اس کو جہنم کی آگ کی جانب لیجانے کا حکم دیں گے، بندہ جانے لگے گا مگر بار بار چہرہ پھیر کر دیکھتا رہے گا(اس امید سے کہ شاید ابھی بخشش کی نوید سنادی جائے، مگر مایوس ہونے پر )کہے گا: اے میرے رب ، آپ کی عزت وجلال کی قسم ، میں نے آپ کی ذات کو معمولی سمجھتے ہوئے نافرمانی نہیں کی، بلکہ جس طرح آپ نے دنیا میں پردہ پوشی فرمائی، اسی بخشش کی امید پر گناہ کرتا تھا۔ مگر مجھے اس بات کا بخوبی یقین تھا کہ آپ کی نافرمانی سے بادشاہت میں کوئی نقصان نہیں ہوگا، اور آپ کی رحمت سے آپ کی سلطنت میں ذرا بھر کمی واقع نہ ہوگی۔ سو اللہ تبارک وتعالی فرمائیں گے کہ میرے بندے تو نے سچ کہا، تمہیں میری رحمت نے مایوسی سے بچایا، میری عزت وجلال کی قسم، میں آج تمہاری بخشش کردوں گا، اے فرشتوں کی جماعت ! میرے اس بندے کو جنت پہنچادو۔