سوال: مفتی صاحب ! ایک شخص کے مرنے کے بعد اس کے کپڑے اور اشیاء ضروریات پر شریعت کی طرف سے کیا حکم لگتا ہے؟ کیا اس کی بیوہ کو تمام چیزیں صدقہ کرنے کا اختیار ہے؟

جواب: واضح رہے کہ کسی شخص کے انتقال کے بعد اس کے ترکہ میں اس کے تمام شرعی ورثاء اپنے اپنے شرعی حصوں کے تناسب سے حق دار ہو جاتے ہیں، کسی ایک وارث کے لیے دوسرے وارث کے حصے کو اس کی رضامندی کے بغیر استعمال کرنا یا اس میں تصرف کرنا درست جائز نہیں ہے۔
لہٰذا پوچھی گئی صورت میں بیوہ کو مرحوم شوہر کی متروکہ چیزیں صدقہ کرنے کا اختیار نہیں ہے۔
البتہ مشورہ کے طور پر عرض کیا جاتا ہے کہ اگر ایسی چھوٹی چھوٹی چیزیں جن کی تقسیم کرنا مشکل ہے، تمام ورثاء کی دلی اجازت سے کسی ایک وارث کو دیدیں یا آپس میں تقسیم کرلیں یا کسی غریب کو صدقہ میں دیدی جائیں یا کسی نیک آدمی کو ھدیہ کردی جائیں تو اس کا ثواب مرحوم کو بھی ملے گا اور تقسیم کا معاملہ بھی حل ہو جائے گا، لیکن یاد رہے کہ یہ صورت اس وقت ہے جب تمام ورثاء اس پر دلی طور پر راضی ہوں۔