سوال: محترم مفتی صاحب ! زید اپنے دوست کے کمرے میں جاتا ہے، جہاں دوست کے ساتھ ایک ہندو فرد بھی مشترک رہتا ہے اور وہاں شراب کی بوتل اور گلاس پر نظر پڑتی ہے، گفت و شنید کے بعد اندازہ ہوتا ہے کہ ہندو فرد نے شراب پی رکھی ہے، اسی اثناء میں کھانا تیار ہوتا ہے اور سب ملکر دسترخوان میں کھانا کھاتے ہیں (ہندو فرد کے ساتھ) پوچھنا یہ ہے کہ کیا اس صورت میں زید کو کھانے سے اجتناب کرنا چاہئے تھا؟ کیا زید گنہگار ہوا؟ یا کوئی کفارہ دینا ہوگا؟

جواب: کفار کے ساتھ  بلا ضرورت  کھانا کھانا صحیح نہیں ہے، البتہ اگر کسی مجبوری سے یا اتفاقاً اس کی نوبت آجائے تو اس میں کوئی مضائقہ نہیں، لہذا ضروری ہے کہ ایسی مجلسوں میں شرکت سے مکمل اجتناب کیا جائے، جہاں شراب پی جاتی ہو، خاص طور پر جب شرابی کے ہاتھ و منہ پر شراب لگی ہوئی ہو ، البتہ کہیں ایسی صورت پیش آجائے تو اس کا کوئی خاص کفارہ نہیں ہے، اس پر توبہ واستغفار کیا جائے۔