سوال: مفتی صاحب !رمضان المبارک کی آمد پر مسنون دعا ارشاد فرمادیں۔

جواب: ۱) امام طبرانی نے ’’کتاب الدعاء میں لکھا ہے کہ مسلمان رمضان کا مہینہ داخل ہونے پر یہ دعا کیا کرتے تھے: اَللّٰهُمَّ أَظَلَّ شَهْرُ رَمَضَانَ وَحَضَرَ، فَسَلِّمْهُ لِيْ وَسَلِّمْنِيْ فِيْهِ، وَتَسَلَّمْهُ مِنِّيْ اَللّٰهُمَّ ارْزُقْنِيْ صِيَامَهٗ وَقِيَامَهٗ صَبْرًا وَّاحْتِسَابًا وَّارْزُقْنِيْ فِيْهِ الْجِدَّ وَالِْاجْتِهَادَ وَالْقُوَّةَ وَالنَّشَاطَ وَأَعِذْنِيْ فِيْهِ مِنَ السَّاٰمَةِ وَالْفَتْرَةِ وَالْكَسَلِ وَالنُّعَاسِ وَوَفِّقْنِيْ فِيْهِ لِلَيْلَةِ الْقَدْرِ وَاجْعَلْهَا خَيْرًا لِّيْ مِنْ أَلْفِ شَهْرٍ
ترجمہ: اے اللہ! رمضان کا مہینہ قریب آ گیا، پس آپ اس مہینے کو میری سلامتی کا ذریعہ بنائیے اور مجھے اس مہینے میں گناہوں سے محفوظ فرمائیے اور میری طرف سے اسے سلامتی والا بنائیے۔ اے اللہ! مجھے صبر اور اجر کی امید کے ساتھ اس کے روزے اور راتوں کی عبادت کی توفیق عطا فرمائیے، اور اس مہینے میں مجھے کوشش کرنے کی، محنت کرنے کی، طاقت کی اور چستی کی توفیق عطا فرمائیے، اور مجھے بچا لیجیے اس مہینے میں اکتاہٹ، تھکنے، سستی اور اونگنے سے،اور اس مہینے میں مجھے شب قدر نصیب فرمائیے جس کو آپ نے ہزار مہینے سے بہتر بنایا ہے۔
۲) حضرت عائشہ رضی اللہ تعالیٰ عنہا فرماتی ہیں کہ جب رمضان کا مہینہ آیا تو میں نے عرض کیا: اے اللہ کے رسول! رمضان کا مہینہ آگیا میں اس میں کیا دعا مانگوں؟ آپ صلی اللّٰہ علیہ وسلم نے فرمایا: تم یہ دعا مانگو: اللَّهُمَّ إِنَّكَ عَفُوٌّ تُحِبُّ الْعَفْوَ فَاعْفُ عَنِّي ترجمہ: اے اللہ! تو معاف کرنے والا ہے، معافی کو پسند کرتا ہے، پس مجھے معاف فرما دے۔ (الدعاء للطبرانی،حدیث نمبر:915)
۳) حضرت عبادۃ بن صامت رضی اللہ عنہ سے روایت ہے کہ جناب رسول اللہ ﷺ ہمیں رمضان کی آمد یہ کلمات سکھایاکرتے تھے کہ ہم یہ کہا کریں کہ اللَّهُمَّ سَلِّمْنِي مِنْ رَمَضَانَ، وَسَلِّمْ رَمَضَانَ لِي، وَتَسَلَّمْهُ مِنِّي مُتَقَبَّلاً ترجمہ: اے اللہ ! مجھے رمضان کےلیے اور رمضان کو میرے لیے سلامت رکھ اور رمضان کو میرے لیے سلامتی کے ساتھ قبولیت کاذریعہ بنا۔ (کتاب الدعاء للطبرانی، رقم الحدیث: 913)
ایک اور روایت میں’’ مِنْ رَمَضَانَ‘‘ کے بجائے ’’ لِرَمَضَانَ ‘‘ کے الفاظ ذکر کیے گئے ہیں-