سوال: محترم جناب مفتی صاحب! السلام علیکم، مجھے اپنےمال میں زکاۃ کے حوالے مسئلہ معلوم کرنا ہے، جس تفصیل یہ ہے: میرے پاس اس وقت گھر میں 53000 کیش موجود ہے، اور یہ رقم میں نے مختلف مراحل میں جمع کی تھی، جو تقریبا ایک لاکھ سے زائد ہوگئی تھی اور تین سال سے میں اس کی زکاۃ بھی ادا کررہا ہوں، اور پھر دو ماہ قبل یعنی فروری میں میری ملازمت ختم ہوئی، جس پر مجھے بہبود فنڈ کی مد میں ایک لاکھ نوے ہزار (190000) روپے ملے، جو میرے اکاونٹ میں موجود ہیں۔
اس کے علاوہ میں نے نومبر 2021 سے ایک جگہ ماہانہ تین ہزار روپے کی کمیٹی بھی ڈالی ہوئی ہے اور اس کی اب تک سات قسطیں یعنی 21000 روپے جمع کرواچکا ہوں اور کمیٹی اب تک وصول نہیں کی ہے۔
اس کے علاوہ ہماری ایک مطلقہ ہمشیرہ ہیں، جو ہمارے ساتھ ہی رہائش پذیر ہیں، بڑے بھائی ماہانہ ان کو کچھ خرچہ بھیجتے ہیں، جس میں سے انہوں نے میرے نام پر (مطلب میری شادی کے لئے) اگست ؁2020ء سے ماہانہ دس ہزار روپے کی ایک کمیٹی ڈالی ہے، جس کی اب تک وہ 20 قسطیں ادا کرچکیں ہیں اور یہ کمیٹی بھی اب تک نہیں کھلی ہے۔
اب مذکورہ بالا تفصیل کی رو سے میرے اوپر کتنی زکواۃ واجب ہے؟ برائے کرم جواب مرحمت فرما کر بندہ کو ممنون فرمائیں۔

جواب: سوال میں ذکر کردہ تفصیل کے مطابق سال پورا ہونے پر ترپین ہزار روپے، ایک لاکھ نوے ہزار روپے اور جو کیمٹی کی قسطیں ادا کرچکے ہیں، ان سب کی زکوٰۃ ادا کرنا ہوگی، باقی جو رقم آپ کے بھائی ہمشیرہ کے پاس بھیجتے ہیں، وہ چونکہ آپ کی ہمشیرہ کی رقم ہے، اس کی زکوٰۃ آپ پر نہیں ہے۔