سوال: السلام علیکم، مفتی صاحب! کثرتِ سے درود شریف پڑھنے کا کیا مطلب ہے، کثرت کی تعداد کم از کم کتنی ہونی چاہیے؟ رہنمائی فرمادیں۔

جواب: واضح رہے کہ احادیث مبارکہ میں نبی کریم صلی اللہ علیہ وسلم پر بکثرت درود شریف پڑھنے کی ترغیب وارد ہوئی ہے، البتہ احادیث مبارکہ میں کثرت کی کوئی متعین تعداد مذکور نہیں ہے، بلکہ یہ ہر شخص کے رسول اللّٰہ صلی اللّٰہ علیہ وسلم سے محبت وعقیدت پر مبنی ہے کہ وہ جس قدر چاہے، درود شریف پڑھے۔
چنانچہ حضرت ابی بن کعب رضی اللہ تعالی عنہ بیان کرتے ہیں کہ انہوں نے رسول اللہ صلی اللہ علیہ وسلم سے کہا کہ :"اے اللہ کے رسول ! میں آپ پر زیادہ درود پڑھتا ہوں، تو آپ صلی اللہ علیہ وسلم کا کیا خیال ہے کہ میں آپ پر کتنا درود پڑھوں؟ آپ صلی اللہ علیہ وسلم نے فرمایا : جتنا چاہو۔ میں نے کہا : چوتھا حصہ؟ آپ صلی اللہ علیہ وسلم نے فرمایا : جتنا چاہو اور اگر اس سے زیادہ پڑھو گے، تو وہ تمہارے لئے بہتر ہے۔ میں نے کہا : آدھا حصہ؟ آپ صلی اللہ علیہ وسلم نے فرمایا : جتنا چاہو اور اگر اس سے زیادہ پڑھو گے، تو وہ تمہارے لئے بہتر ہے۔ میں نے کہا : دو تہائی؟ آپ صلی اللہ علیہ وسلم نے فرمایا : جتنا چاہو اور اگر اس سے زیادہ پڑھو گے، تو وہ تمہارے لئے بہتر ہے۔ میں نے کہا : میں آپ پر درود ہی پڑھتا رہوں تو؟ آپ صلی اللہ علیہ وسلم نے فرمایا : تب تمھیں تمھاری پریشانی سے بچا لیا جائے گا اور تمھارے گناہ معاف کر دئیے جائیں گے۔
(سنن الترمذی، حدیث نمبر: 2457)
اس حدیث کے الفاظ "جتنا چاہو" سے واضح طور پر معلوم ہوا کہ درود شریف کی کثرت کی کوئی تعداد شرعاً متعین نہیں ہے۔
البتہ علمائے کرام اور بزرگان دین نے سہولت وآسانی اور عادت بنانے کی غرض سے روزانہ صبح وشام سو سو مرتبہ درود شریف پڑھنے کو اپنی زندگی کے معمولات میں شامل کرنا تجویز کیا ہے، کیونکہ جو کام مستقل عادت بناکر کیا جاتا ہے، وہ اللہ تعالیٰ کو زیادہ پسندیدہ ہے، اگرچہ وہ کم ہی کیوں نہ ہو، اور یہ تعداد بظاہر ایسی ہے کہ اس کو ساری زندگی استقامت کے ساتھ نبھانا آسان ہے، ہاں! اگر کسی کو اس سے زیادہ کی توفیق استقامت کے ساتھ نصیب ہوجائے، تو کیا کہنے، یہ اس کی خوش نصیبی اور خوش بختی ہے۔
اللہ پاک ہم سب کو کثرت سے اپنے حبیب حضرت محمد مصطفی صلی اللہ علیہ وسلم پر درود و سلام پڑھنے کی توفیق عطا فرمائے، تاکہ بروز قیامت حضور اکرم صلی اللہ علیہ وسلم کے قرب اور شفاعت سے فیضیاب ہو سکیں۔ آمین