سوال: درج ذیل روایت بہت مشہور ہے، اس کے بارے میں بتائیے کیا یہ روایت صحیح ہے؟
حضورﷺ نے حضرت علیؓ سے فرمایا: اے علی! رات کو روزانہ پانچ کام کر کے سویا کرو:(۱)چار ہزار دینار صدقہ دے کر سویا کرو (۲) ایک قرآن شریف پڑھ کر سویا کرو (۳) جنت کی قیمت دے کر سویا کرو (۴) دو لڑنے والوں میں صلح کراکر سویا کرو (۵) ایک حج کر کے سویا کرو۔
حضرت علیؓ نے عرض کیا: یا رسول اللہ! یہ کام کیسے ممکن ہے؟ حضورﷺ نے ارشاد فرمایا: چار مرتبہ سورہ فاتحہ پڑھنے کا ثواب چار ہزار دینار صدقہ دینے کے برابر ہے، تین مرتبہ سورہ اخلاص پڑھنے کا ثواب ایک بار قرآن شریف پڑھنے کے برابر ہے، دس مرتبہ درود شریف پڑھنے سے جنت کی قیمت ادا ہوگی، دس مرتبہ استغفار پڑھنے کا ثواب دو لڑنے والوں میں صلح کرانے کے برابر ہے، چار مرتبہ تیسرا کلمہ پڑھنے سے ایک حج کا ثواب ملے گا، اس پر حضرت علیؓ نے فرمایا کہ یا رسول اللہ! اب میں روز یہی عملیات کرکے سویا کروں گا۔

جواب: سوال میں ذکر کردہ روایت باوجود تلاش کے کسی بھی صحیح اور ضعیف سند سے کتبِ احادیث مبارکہ میں نہیں ملی اور ذکر کردہ روایت میں جناب رسول اللہ ﷺ کی حضرت علی رضی اللہ عنہ کو کی گئی وصیت کا ذکر ہے، جبکہ محدثین کرام رحمہم اللہ نے لکھا ہے کہ حضرت علی رضی اللہ عنہ کی طرف منسوب وصیتیں اکثر موضوع (من گھڑت) ہیں، لہذا اس روایت کو بیان کرنا اور اس کو جناب رسول اللہ ﷺ کی طرف منسوب کرنا درست نہیں ہے۔