سوال: مجھے ایک مسئلہ کے بارے میں آپ لوگوں کی رہنمائی درکار ہے، اکثر لوگوں سے سنتے آرہے ہیں اور علماء کرام کے بیانات میں بھی یہ بات ہم سنتے ہیں کہ بلاوجہ کسی بھی عالم دین کو گالی دینے سے اس انسان کا نکاح ٹوٹ جاتا ہے۔ اس سلسلہ میں مندرجہ ذیل سوالات کے جوابات مطلوب ہیں:
۱) کیا اس طرح کرنے سے انسان گناہ گار ہوتا ہے؟
۲) کیا اس سے اس کا نکاح ٹوٹ جاتا ہے، کیونکہ کچھ علماء کے کام بظاہر ٹھیک نہیں لگتے جس کی وجہ سے انہیں گالی پڑتی ہے تو کیا انہیں گالی دینے والا بھی کافر ہو جاتا ہے؟

جواب: (۱) کسی بھی مسلمان کو گالی دینا سخت گناہ اور موجبِ فسق ہے، صحيح بخاری کی حدیث میں ہے، حضورﷺ نے فرمایا: "مسلمان کو گالی دینا فسق ہے اور اس سے قتل و قتال کرنا کفر ہے"۔
علمائے کرام حضراتِ انبیاء علیہم السلام کے علمی وارث ہیں، اس لیے ان کو برا بھلا کہنا اور ان سے بغض رکھنا بہت بڑا گناہ ہے، جس سے احتراز کرنا ضروری ہے۔
(۲) علماء کو گالی دینے سے کافر ہوجانے اور نکاح ٹوٹنے میں تفصیل ہے: وہ یہ کہ اگر کسی عالم دین کو بغیر کسی ظاہری سبب کے محض اس لیے گالی دی جائے کہ اس کا تعلق دین اور علمِ دین کے ساتھ ہے تو اس عمل سے گالی دینے والا شخص دائرہ اسلام سے نکل جاتا ہے اور اس کا نکاح بھی ٹوٹ جاتا ہے، ایسی صورت میں اس پر لازم ہے کہ توبہ کرکے تجدیدِ ایمان کے بعد دوبارہ نکاح کرے۔
اور اگر خدانخواستہ کسی عالمِ دین کے کچھ افکار یا اعمال واضح طور پر دینِ اسلام کی واضح تعلیمات کے خلاف ہوں اور ان غلط افکار یا اعمال کی وجہ سے یا اپنی کسی ذاتی لڑائی جھگڑے کی وجہ سے اگر کوئی اسے برا بھلا کہتا ہے تو ایسا شخص کافر تو نہیں ہوگااور اس کا نکاح بھی نہیں ٹوٹے گا، تاہم کسی کو بھی گالی دینا گناہ کا کام اور ناجائز فعل ہے، جس سے ہر حال میں احتراز کرنا لازم ہے۔