سوال: زید نے عمرو کو اجرت پر کوئی کام دیا، عمرو نے ناقص میٹیریل استعمال کیا جس کے باعث زید کا اچھا خاصا نقصان ہوا، اب سوال یہ ہے کہ آیا عمرو اپنے کام کی اجرت کا مستحق ہوگا یا نہیں؟ اور زید کا جو نقصان ہوا ہے، اس کا ذمہ دار کون ہوگا؟

جواب: اگر معاملہ کرتے وقت ساری چیزیں صاف طور پر طے ہوئی تھیں کہ فلاں چیز لگانی ہے یا ایسی کوالٹی کا مٹیریل استعمال کرنا ہے، اس کے باوجود عمرو نے ناقص مٹیریل (طے شدہ کوالٹی کے علاوہ) استعمال کیا ہو تو نقصان کا ذمہ دار عمرو ہے، اس لیے زید کو اختیار ہے کہ دوبارہ عمرو سے وہ کام اسی اجرت میں کروائے۔ تاہم اگر دونوں اس بات پر صلح کرلیں کہ نقصان زید خود برداشت کرے گا اور عمرو کو کم اجرت ملے گی یا بالکل کچھ نہیں ملے گا تو باہمی رضامندی سے ایسا کرنا بھی درست ہے۔