سوال: السلام علیکم، مفتی صاحب! بیوہ جوان خاتون ہیں، ان کے شوہر کا ابھی انتقال ہوا ہے، دو بیٹے باہر ملک پڑھنے گئے ہیں، وہ یہاں ایک اسلامی اسکول میں پڑھاتی ہیں، معاش کا کوئی مسئلہ نہیں، وہ عدت میں اسکول جانا چاہتی ہیں، تاکہ ڈپریشن سے بچ سکیں، کیونکہ یہاں وہ گھر میں تنہا ہیں، اس لیے وہ عدت کے دوران بھی اسکول جانا چاہتی ہیں، کیا وہ اسکول جاسکتی ہیں؟ جبکہ ان کا معاش کا کوئی مسئلہ نہیں ہے۔ براہ کرم رہنمائی فرمائیں۔

جواب: عدت وفات کے دوران عورت کیلئے بغیر کسی عذر شرعی کے گھر سے نکلنا (چاہے دن ہو یا رات)جائز نہیں، البتہ اگر کوئی شرعی ضرورت در پیش ہو، مثلاً سخت بیمار ہو، تو ڈاکٹر وغیرہ کو دکھانے کے لئے جاسکتی ہے، اسی طرح اگر عدت وفات میں بیٹھی ہوئی عورت کے پاس گزر بسر کے لیے کوئی انتظام نہ ہو، تو کسب معاش کی غرض سے دن کے وقت نکلنے کی گنجائش ہے، لیکن رات بہرحال گھر میں آکر گزارے۔
واضح رہے کہ محض تنہائی یا دل کا غم دور کرنے کے لیے بیوہ کا دوران عدت گھر سے نکلنا جائز نہیں ہے، البتہ بیوہ کو ڈپریشن سے بچانے اور تنہائی دور کرنے کے لیے اس کے محرم رشتہ داروں اور تعلق رکھنے والی عورتوں کو چاہیے کہ وہ کبھی کبھار بیوہ کے گھر جا کر اس کی دل جوئی کر لیں، شرعاََ اس میں کوئی حرج نہیں ہے۔