سوال: مفتی صاحب ! آپ صلی اللّٰہ علیہ وسلم عیدین کی نماز کس وقت پڑھاتے تھے؟ وضاحت فرمادیں مہربانی ہوگی۔

جواب: احادیث مبارکہ سے یہ بات معلوم ہوتی ہے کہ جناب رسول اللہ ﷺعیدین کی نماز سورج طلوع ہو کر ایک نیزہ کے بقدر بلند ہونے کے بعد (یعنی اشراق کے وقت) سے زوال سے پہلے تک پڑھایا کرتے تھے۔
حضرت جندب رضی اللہ عنہ فرماتے ہیں کہ جناب رسول اللہ ﷺ ہمیں عیدالفطر کی نماز دو نیزے کے برابر سورج ہونے پر پڑھاتے اور عیدالاضحی کی نماز اس وقت پڑھاتے جب سورج ایک نیزہ پر ہوتا۔
(التلخيص الحبير لابن حجر العسقلاني، 196/2،ط:دار الكتب العلمية)
صحابی ٔ رسول ﷺ حضرت عبداللہ بن بسر رضی اللہ عنہ لوگوں کے ساتھ عید الفطر یا عید الاضحی کے دن نکلے، تو انہوں نے امام کے دیر کرنے کو ناپسند کیا اور کہا: ہم تو اس وقت عید کی نماز سے فارغ ہو جاتے تھے اور یہ اشراق پڑھنے کا وقت تھا۔
(سنن أبي داود،رقم الحدیث: 1135،ط: دار الرسالة العالمية)
حضرت ابوالحریث رحمہ اللہ کہتے ہیں کہ جناب رسول اللہ ﷺنے عمرو بن حزم کو خط لکھا، جب وہ نجران میں تھے کہ وہ عیدالاضحی میں جلدی اور عیدالفطر میں تاخیر کریں اور لوگوں کو (خطبہ میں) نصیحت کریں۔
(السنن الكبرى للبيهقي،رقم الحديث: 6149 ،ط: دار الكتب العلمية)
حضرت ابو عمیر بن انس بن مالک رحمہ اللہ کہتے ہیں کہ مجھے میری انصاری پھوپھی نے خبر دی کہ جناب رسول اللہ ﷺ کے زمانہ میں رمضان کی آخری رات میں چاند لوگوں پر مخفی ہوگیا (نظر نہیں آیا) لوگوں نے روزے کی حالت میں صبح کی (یعنی سب نے روزہ رکھا) زوالِ آفتاب کے بعد لوگوں نے آپ ﷺ کے سامنے گواہی دی کہ انہوں نے گذشتہ رات چاند دیکھا ہے، تو آپ ﷺ نے لوگوں کو افطار(روزہ توڑنے) کا حکم دیا، تو لوگوں نے اسی وقت افطار کیا، اگلے روز صبح آپ ﷺ لوگوں کو (عیدگاہ کی طرف لے کے) نکلے اور انہیں عید کی نماز پڑھائی۔
(شرح معاني الآثار:(رقم الحديث: 2273،ط: عالم الكتب)
پہلی تین روایات سے عیدین کی نماز کے ابتدائی وقت کا پتہ چلتا ہے اور چوتھی روایت سے عیدین کی نماز کے آخری وقت کا پتہ چلتا ہے، کیونکہ جب آپ کے سامنے زوال کے بعد گواہی دی گئی، تو آپ نے اس وقت روزہ افطار کرنے کا حکم دیا، لیکن اس وقت عید کی نماز نہیں پڑھی، بلکہ اگلے روز صبح تک عید کی نماز کو مؤخر فرمایا، جس سے ثابت ہوا کہ زوال کے بعد عید کی نماز جائز نہیں۔
خلاصہ کلام:
جناب رسول اللہ ﷺعیدین کی نماز سورج طلوع ہو کر ایک نیزہ کے بقدر بلند ہونے کے بعد (یعنی اشراق کے وقت) سے زوال سے پہلے تک پڑھایا کرتے تھے۔
واضح رہے کہ ایک نیزہ کی مقدار تقریباً دس منٹ ہے اور دو نیزہ کی مقدار بیس منٹ ہے،لہذا طلوعِ آفتاب کے دس منٹ بعد اشراق کا وقت شروع ہوجاتا ہے، البتہ زیادہ احتیاط بیس منٹ بعد پڑھنے میں ہے۔