سوال: السلام علیکم، مفتی صاحب! ہمارے علاقے میں ایک بندہ جوڑوں کے درد کا دم کرتا ہے، اور وہ اس پر پہلے سورہ یاسین سے " وَامْتَازُوا الْيَوْمَ أَيُّهَا الْمُجْرِمُونَ " پڑھتے ہیں، اور پھر جناب نبی کریم صلی اللہ علیہ وسلم کے نام " محمد، احمد، محمود، عاقب، فاتح، حاشر، ماح، داع، رسول، مہد، طه، یاسین " سات یا نو مرتبہ پڑھتے ہیں، اور آ خر میں پھر سورہ یاسین سے " سَلَامٌ قَوْلًا مِنْ رَبٍّ رَحِيمٍ " پڑھ کر دم کرتے ہیں۔ آپ حضرات سے گزارش ہے کہ رہنمائی فرمائیں کہ کیا اس طرح سے دم کروانا ٹھیک ہے یا نہیں؟ کیونکہ کوئی کہتا ہے کہ صرف قرآنی آیات اور اسماء الحسنٰی سے دم کر سکتے ہیں، تو کوئی کچھ اور کہتا ہے۔ براہ کرم رہنمائی فرمائیں۔

جواب: واضح رہے کہ ایسے تعویذات اور جھاڑ پھونک جو آیاتِ قرآنیہ، ادعیہ ماثورہ یا کلماتِ صحیحہ پر مشتمل ہوں، ان سے علاج کرنا شرعاً درست ہے، کیونکہ اس کی حقیقت ایک جائز تدبیر سے زیادہ کچھ نہیں، اور جن تعویذات یا جھاڑ پھونک میں کلماتِ شرکیہ، کلماتِ مجہولہ یا نامعلوم قسم کے منتر لکھے جائیں یا انہیں مؤثر حقیقی سمجھا جائے، تو ان کا استعمال شرعاً جائز نہیں ہے۔
سوال میں ذکر کردہ صورت میں اگر رسول اللہ (صلی اللہ علیہ وسلم) کے صفاتی نام دم میں درود شریف کے ضمن میں ذکر کیے جاتے ہیں، تو اس میں کوئی حرج نہیں ہے، ایسا دم کرنا جائز ہے۔
لیکن اگر دم کرنے والے کا مقصد ان صفاتی ناموں کے ذریعے آپ (صلی اللہ علیہ وسلم) کو مخاطب کرکے آپ سے مریض کی شفایابی کے لیے مدد طلب کرنے کا عقیدہ ہے، تو ایسی صورت میں یہ شرکیہ عمل ہے، جس سے بچنا ضروری ہے۔