سوال: آپ سے زکوة کے بارے میں ایک سوال پوچھنا تھا کہ اگر کسی عورت کے پاس ساڑھے سات تولہ سے کم سونا ہو اور اس کا خاوند اسے ہر ماہ 2000 یا 3000 روپے جیب خرچ دیتا ہو اور وہ اسے مہینے میں یا دو مہینے میں خرچ کردیتی ہو، خلاصہ یہ کہ ہر ماہ پیسے ملتے ہوں اور خرچ ہوتے ہوں تو کیا اس پر زکوة ہوگی؟ کیونکہ میں نے ایک فتوی دیکھا تھا کہ اگر کسی کے پاس صرف ایک تولہ سونا ہو اور اس کے ساتھ کچھ رقم بھی ہو چاہے دس بیس روپے ہی کیوں نہ ہو تو اس پر زکوة واجب ہوگی اور رقم پر سال گزرنا بھی لازم نہیں۔ اب پوچھنا یہ ہے کہ سونے کیساتھ جو رقم ہو اس پر کتنا عرصہ گزر جائے تو زکواة واجب ہوگی؟ کیونکہ ہوسکتا ہے کہ وہ اس جیب خرچ کی رقم کو ایک مہینے میں نہیں بلکہ دو تین مہینے رکھ کر خرچ کرلے۔

جواب: 1- اگر کسی کی ملکیت میں ساڑھے سات تولہ سے کم سونا ہو اور اس کے ساتھ سال کے شروع اور آخر میں چاندی، مال تجارت یا ضرورت سے زائد نقد رقم ہو اور ان سب کی مجموعی مالیت ساڑھے باون تولہ چاندی کی قیمت کے بقدر ہو، تو ایسے شخص پر زکوٰۃ ادا کرنا لازم ہوگا، لیکن اگر اس سونے کے ساتھ سال کے شروع اور آخر میں ضرورت سے زائد نقد رقم یا مال تجارت یا چاندی نہ ہو، بلکہ درمیان سال میں رقم آتی رہی اور خرچ ہوتی رہی، تو ایسے شخص پر زکوۃ واجب نہیں ہے۔
2- ایک مرتبہ زکوٰۃ کے نصاب کا مالک بن جانے کے بعد مال کے ہر ہر حصے پر علیحدہ علیحدہ مکمل سال گزرنا ضروری نہیں ہے، لہذا جب کوئی شخص زکوٰۃ کے نصاب کا مالک بن گیا، تو سال مکمل ہونے کے بعد اس کی ملکیت میں موجود تمام قابلِ زکوٰۃ اثاثوں کا حساب کیا جائے گا، اگر وہ نصاب کے برابر یا زیادہ ہوں تو زکوٰۃ لازم ہوگی، درمیان سال میں آنے والی ہر ہر رقم پر علیحدہ علیحدہ سال گزرنا ضروری نہیں ہے۔
مذکورہ بالا تفصیل کے مطابق اگر کسی خاتون کے پاس سونا ساڑھے سات تولے سے کم ہو اور اس کے پاس کچھ نقدی بھی ہو، جو اس کی ضرورت (مثلاً: گھریلو ماہانہ اخراجات) سے زائد ہو، اس سونے اور نقدی کو ملا کر چاندی کا نصاب (ساڑھے باون تولہ) کی مالیت پوری ہوتی ہو، تو وہ خاتون زکوٰۃ کے نصاب کی مالک بن جائے گی، اور اگر سال پورا ہونے پر بھی اس کی یہی صورت ہو، تو ایسی خاتون پر زکوٰۃ ادا کرنا شرعاً واجب ہے۔