سوال: السلام علیکم، مفتی صاحب! ایک ایپلیکیشن جسکا نام ٹرٹل منٹ پرو turlte mint Pro ہے، اس موبائل ایپ سے کار، بائک، لائف اور ہیلتھ انشورنس کیا جا سکتا ہے، اس ایپ میں ایک ہفتے میں تین دن تک سوال جواب کا مقابلہ ہوتا ہے، جس میں چھ سوال ہوتے ہیں، اور جو اُن سوالوں کا صحیح جواب دیتا ہے، اُسے بطور انعام کچھ پیسے 50 روپے سے 200 روپے تک دیے جاتے ہیں، جو ایک مہینہ بعد اکاؤنٹ میں آجاتے ہیں، تو کیا یہ پیسے جائز ہے؟ اور اگر جائز نہیں ہے، تو اب تک اس ایپ سے جو پیسے ملے ہیں، ان کا مجھے کیا کرنا چاہئے؟ میں اسے 3 مہینوں سے چلا رہا ہوں، اور میں نے اس ایپ کے بارے میں کئی لوگوں کو بتایا بھی ہے، وہ بھی اسی طرح پیسے کما رہے ہیں، اگر یہ جائز نہیں، تو کیا جن لوگوں کو میں نے بتایا ہے اس کا گناہ مجھے ملے گا؟ ایسی حالت میں مجھے کیا کرنا چاہیے؟ میں بہت کنفیوز ہوں۔ براہ مہربانی میری رہنمائی فرمادیں۔

جواب: سوال میں ذکر کی گئی تفصیل کے مطابق یہ ایپ انشورنس کے کاروبار سے متعلق ہے، اور مروجہ انشورنس سود، قمار اور جوا پر مشتمل ہونے کی وجہ سے جائز نہیں ہے، لہذا ایسے کاروبار میں شرکت کرنا یا کسی کو شرکت کیلئے دعوت دینا اور دعوت دینے کے عوض پیسے کمانا جائز نہیں ہے۔
البتہ سوال و جواب کے مقابلے میں اگر کوئی غیر شرعی خرابی نہ ہو، تو محض سوال و جواب کے مقابلے سے وصول ہونے والی انعامی رقم ناجائز نہیں کہلائے گی، البتہ اس سے چونکہ غیر شرعی کاروبار کی ایک طرح سے تشہیر (Marketing) اور معاونت لازم آتی ہے، اس لئے ایسی سرگرمی سے بچنا چاہیے۔