سوال: مفتی صاحب اس حدیث کے بارے میں بتائیں:حضرت کبشہ بنت ابوبکرہ سے روایت ہے کہ ان کے والد نے اپنے گھر والوں کو منگل کے دن پچھنے لگوانے سے منع کیا تھا اور حضور ﷺ سے نقل کرتے تھے کہ منگل کا دن خونی دن ہے اور اس میں ایک گھڑی ایسی ہے کہ اس میں خون نکلنے سے انسان تندرست نہیں ہوتا۔ کیا یہ روایت درست ہے اور کیا منگل کے دن حجامہ نہیں لگوانا چاہیے؟

جواب: واضح رہے کہ منگل کے دن حجامہ لگوانے سے متعلق مختلف روایات وارد ہوئی ہیں، بعض روایات میں منگل کے دن حجامہ لگانے سے منع کیا گیا ہے، جیسا کہ سنن ابی داؤد میں ہے:
حضرت کبشہ بنت ابوبکرہ سے روایت ہے کہ ان کے والد نے اپنے گھر والوں کو منگل کے دن پچھنے لگوانے سے منع کیا تھا اور حضور ﷺ سے نقل کرتے تھے کہ منگل کا دن خونی دن ہے اور اس میں ایک گھڑی ایسی ہے کہ اس میں خون نکلنے سے انسان تندرست نہیں ہوتا۔
(سنن أبي داؤد،حدیث نمبر:3862)
اس روایت سے معلوم ہوتا ہے کہ منگل کے دن حجامہ نہیں لگوانا چاہیے۔
حضرت معقل بن یسار رضی اللہ عنہ سے روایت ہے کہ جناب رسول اللہ ﷺ نے ارشاد فرمایا: منگل کے دن سترھویں تاریخ کو سینگی کھنچوانا سال بھر کی بیماریوں کا علاج ہے۔
(المعجم الکبیر للطبراني، حدیث نمبر:499)
اس روایت سے معلوم ہوتا ہے کہ منگل کے دن حجامہ لگوانا چاہیے۔
ملاعلی قاری ؒ نے دونوں روایات میں تطبیق کرتے ہوئے فرمایاکہ منع والی روایت سترہ تاریخ کی منگل کے علاوہ کے ساتھ خاص ہے۔
ملاعلی قاری ؒ کی اس توجیہ کی وضاحت دیگر بعض روایات سے بھی ہوتی ہےکہ جناب رسول اللہ ﷺنے ارشاد فرمایا:جس کا حجامہ مہینے کی سترہ تاریخ، منگل کے دن کے موافق ہوگیا، تو اس کے لیے سال بھر کی بیماریوں کا علاج ہے۔
(التدوين في أخبار قزوين:3/181)
ایک اور روایت میں ہے کہ حضرت ابن عباس رضی اللہ عنہما فرماتے ہیں کہ میں جناب رسول اللہ ﷺ کی خدمت اقدس میں حاضر ہوا، آپ ﷺ منگل کے دن حجامہ لگوارہے تھے۔ میں نے عرض کیا:اللہ کے رسول ﷺ! آپ اس دن (منگل) حجامہ لگوارہے ہیں تو آپ ﷺ نے فرمایا: جی ہاں! تم میں سے جس کے لیے مہینے کی سترہ تاریخ، منگل کے دن کے موافق ہوجائے تو وہ اس سے آگے نہ بڑھے یہاں تک حجامہ لگوالے، لہذا اس دن حجامہ لگوالیا کرو۔
(المجروحين لابن حبان: 3/59)
خلاصۂ کلام:
اگر قمری مہینے کی سترہ تاریخ منگل کے دن ہو تو حجامہ لگوالینا چاہیے، تاہم ضرورت کے وقت حجامہ کسی بھی تاریخ اور کسی بھی دن لگوایا جاسکتا ہے۔