سوال:
اللہ پاک کے حکم سے عمرہ کی سعادت حاصل ہوئی ہے، جب مدینہ آیا ہوں تو سب لوگوں نے بولا ہمارا سلام پیش کردینا روزہ رسول پر، تو پوچھنا یہ تھا کے سلام پیش کیسے کیا جائے کسی دوسرے بندے کی طرف سے ؟
جزاک اللہ
جواب: روضۂ اقدس پر حاضری کے وقت جیسے خود سلام پیش کرنا درست ہے، اسی طرح دوسروں کی طرف سے بھی سلام پیش کرنا درست ہے، جس کا طریقہ یہ ہے کہ اس طرح کہیں:
“یارسول اللہ ! آپ پر ایمان رکھنے والے اور آپ کا نام لینے والے چند بزرگوں اور عزیزوں نے سلام عرض کیا ہے، آپ ان کا سلام قبول فرمائیں اور ان کے لیے بھی اپنے رب سے مغفرت مانگیں، وہ بھی آپ کی شفاعت کے طلب گار اور امیدوار ہیں۔
عربی میں سلام پیش کرنا ہو، تو ان الفاظ میں سلام پیش کرے:
اَلسَّلاَمُ عَلَیْکَ یَا رَسُوْلَ اللّٰه ! فُلاَنُ بْنُ فُلاَنٍ یُسَلِّمُ عَلَیْکَ یَا رَسُوْلَ اللّٰہِ ۔
فلاں بن فلاں کی جگہ پر سلام کرنے والے مرد یا عورت کا نام لے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔
دلائل:
الھندیۃ: (265/1، ط: دار الفکر)
ثم يقول: السلام عليك يا نبي الله ورحمة الله وبركاته أشهد أنك رسول الله قد بلغت الرسالة وأديت الأمانة ونصحت الأمة وجاهدت في أمر الله حتى قبض روحك حميدا محمودا فجزاك الله عن صغيرنا وكبيرنا خير الجزاء۔۔۔۔۔۔ويبلغه سلام من أوصاه فيقول: السلام عليك يا رسول الله من فلان بن فلان يستشفع بك إلى ربك فاشفع له ولجميع المسلمين
واللہ تعالٰی اعلم بالصواب
دارالافتاء الاخلاص،کراچی