سوال: میرے والد اور چچا نے مشترکہ کمائی سے 1975 میں 120 گز کا کھر بنایا تھا اس کے بعد والد صاحب کی ریٹائرمنٹ کے پیسوں سے اوپر کا فلور نئے سرے سے تعمیر کیا، پھر میرے والد کے انتقال کے بعد ہم نے وہ گھر بیچ کر دو فلیٹ لیے ایک گلشن میں اور دوسرا بفرزون میں لیا جس میں ہماری بڑی بہن رہائش پذیر ہوئی جبکہ گلشن کے فلیٹ میں ہم تین بہنیں چچا کے زیرِ کفالت رہیں اور باقی جو پیسے بچے وہ چچا نے قومی بچت میں جمع کراکر ہماری کفالت مرتے دم تک کی، کیونکہ والد صاحب (مرحوم) ہم چار بہنوں کو چچا کے زیر کفالت چھوڑ کر گئے تھے۔
ہمارا ایک بھائی جس کو چچا نے دبئی بھجوایا تھا وہ 2017 میں واپس آکر والد (مرحوم) کی وراثت کا تقاضا کرنے لگا اور زبردستی مار پیٹ کرکے گلشن کا فلیٹ 53 لاکھ میں بیچ دیا خود 33 لاکھ رکھے اور ہم چار بہنوں کو 3 لاکھ 75 ہزار دیئے اور 6 لاکھ کیش الگ لے کر گاڑی خریدی۔
اس کے بعد ایک بہن کو چچا نے فلیٹ اور گاڑی دلائی اور ایک بہن کا گلشن کا فلیٹ فروخت ہونے سے پہلے ہی انتقال ہوگیا تھا۔ بفرزون کے فلیٹ میں چچا کے ساتھ ہم دو بہنیں مقیم تھیں کہ 2020 میں چچا کا بھی انتقال ہوگیا۔ اب اس فلیٹ اور جو پیسے قومی بچت کھاتے میں جمع ہیں اس میں ہمارا کتنا حصہ ہوگا، نیز اس رقم میں دادی کا حصہ بھی شامل ہے۔
نوٹ: چچا غیر شادی شدہ تھے چچا نے اپنی حیات میں ہی بھائی اور بہن کو فلیٹ دلادیا تھا، اب ہم صرف دو بہنیں رہ گئیں ہیں تو ہم دو بہنوں کا کتنا کتنا حصہ بنے گا؟ چچا نے بھائی کے بچوں کو اپنی جائیداد دینے کی وصیت کی تھی۔

جواب: 1) پوچھی گئی صورت میں آپ کے والد اور چچا اپنی اپنی رقم کے تناسب سے اس مکان میں شریک تھے، لہذا ان دونوں کے انتقال کے بعد ان کی رقم کے تناسب سے ان کی جائیداد ان کے شرعی ورثاء میں تقسیم ہوگی۔
2) واضح رہے کہ آپ کے بھائی نے مکان کی تقسیم غیر شرعی طور پر کی ہے، لہذا ان پر لازم ہے کہ مکان کی دوبارہ شرعی تقسیم کر کے تمام شرعی ورثاء کو ان کا حق دیں، ورنہ ان پر دنیا و آخرت میں اس کا وبال آئے گا۔
3) چچا کا حصہ ان کے شرعی ورثاء میں تقسیم ہوگا۔
4) چچا کی وصیت غیر ورثاء میں ایک تہائی تک نافذ کی جائے گی، چونکہ بھتیجیاں بھتیجے کے ہوتے ہوئے وارث نہیں ہوتیں، اس لیے چچا کی وصیت ایک تہائی تک بھتیجیوں کے حق میں نافذ کی جائے گی۔