سوال:
ایک حدیث مشہور ہے کہ اماں عائشہ صدیقہؓ بیٹھی تھیں، نبی کریم ﷺ تشریف لائے کہا: "مانگو جو مانگتی ہو" آپؓ جلدی سے اپنے والد حضرت ابوبکر صدیقؓ کے پاس گئیں ان کو یہ بات بتائی تو انہوں نے کہا کہ تم کہو کہ معراج کی رات راز والی باتوں میں سے دو باتیں بتا دیجیے۔ کیا یہ حدیث مستند ہے؟
جواب: سوال میں مذکور واقعہ کہ حضرت عائشہ رضی اللہ عنہا نے آنحضرت صلى اللہ علیہ وسلم سے معراج کى رات بارى تعالى کے ساتھ راز ونیاز کى جو باتیں کی تھیں، ان میں سے دو باتوں کو دریافت کیا، یہ واقعہ حدیث اور سیرت کى کسى بھى مستند اور معتبر کتاب میں تلاش کے باوجود نہیں مل سکا ہے، لہذا اس واقعہ کو آنحضرت صلى اللہ علیہ وسلم کى طرف منسوب کر کے بیان کرنے سے اجتناب کرنا چاہیے۔
تاہم اگر معراج کا واقعہ صحیح اور معتبر روایات کى روشنى میں مطالعہ کرنا ہو تو حضرت مفتى عبد الرؤف سکھروى صاحب دامت برکاتہم کى کتاب "معراج کا سچا واقعہ" کا مطالعہ کرنا مفید رہے گا۔
واللّٰہ تعالى أعلم بالصواب
دارالإفتاء الاخلاص،کراچی