سوال: ہر وہ سرکاری ملازم جس کے پاس سرکاری گھر ہو، اس کی تنخواہ میں سے ہاؤس رینٹ کے علاوہ پانچ فیصد تنخواہ سرکاری مکان کے رنگ، روغن، اور مرمت وغیرہ کے نام پر کٹتی ہے لیکن گھر کی مرمت کے لئے جب لکھا جاتا ہے تو اس پر عمل درآمد کے لئے اکثر فنڈز نہیں ہوتے یا پھر لمبے عرصے تک انتظار کرنا پڑتا ہے اور اس دوران اس سرکاری آفیسر کا اس علاقے سے ٹرانسفر ہو جاتا ہے۔
اب پوچھنا یہ تھا کہ اگر کسی سرکاری ملازم کے پاس سرکاری گاڑی ہے اور اسے ہر ماہ پیٹرول کی مد میں سولیٹر پیٹرول کی سیلنگ ملتی ہو لیکن اس کا ماہانہ پیٹرول خرچ پچاس لیٹر ہو تو کیا وہ سو لیٹر پیٹرول دعوی (claim) کرکے پچاس لیٹر پیٹرول کی اضافی رقم سرکاری گھر کی مرمت وغیرہ پر لگا سکتا ہے یا نہیں؟

جواب: پوچھی گئی صورت میں پچاس لیٹر پیٹرول استعمال کرنے کی صورت میں گورنمنٹ سے سو لیٹر کے استعمال کا کہہ کر اضافی رقم وصول کرنا جھوٹ اور غلط بیانی پر مشتمل ہونے کی وجہ سے شرعا جائز نہیں ہے، البتہ اگر حکومت کی پالیسی یہ ہو کہ سو لیٹر پیٹرول کی رقم آپ کو ہر ماہ ملتی رہے گی، چاہے پیٹرول کسی مہینے کم استعمال ہو یا زیادہ، تو پھر ایسی صورت میں اضافی رقم گھر کی مرمت وغیرہ میں استعمال کرنا شرعا درست ہوگا۔