سوال: ایک عورت نے اپنی زندگی میں گھر اپنے تینوں بیٹوں کے نام کر دیا تھا، نام کرنے کے بعد اس عورت کی رہائش اسی گھر میں تھی، اب ایک بیٹا انتقال کر گیا ہے تو جو بیٹا انتقال کر گیا ہے اس کی بیوی بچوں کو اس گھر میں حصہ ملے گا؟

جواب: واضح رہےکہ ہبہ (گفٹ) مکمل ہونے کے لیے شرعا ضروری ہے کہ وہ چیز مالکانہ اختیارات کے ساتھ اس شخص (جس کو ہبہ کی جارہی ہے) کے حوالے کی جائے، اس طور پر کہ ہبہ (گفٹ )کرنے والے کا اس چیز میں کسی قسم کا کوئی عمل دخل (رہائش، ساز و سامان، قبضہ و تصرف) باقی نہ رہے۔
نیز ایک سے زائد لوگوں کو قابلِ تقسیم گھر ہبہ کرنے کے لیے ضروری ہے کہ اس میں ہر ایک کا حصہ متعین کرکے اسے اس کی جگہ دے دی جائے، صرف زبانی طور پر ہبہ کر دینے سے ہبہ مکمل نہیں ہوتا۔
لہذا پوچھی گئی صورت میں اگرچہ والدہ نے مکان تینوں بیٹوں کے نام کر دیا تھا لیکن چونکہ مکان نام کرنے کے بعد والدہ اس گھر سے نہیں نکلی تھیں، اور مشترک مشاع چیز کو تقسیم اور حصے متعین کر کے ہبہ نہیں کیا، اس لیے اس مکان میں تینوں بیٹوں کی ملکیت ثابت نہیں ہوئی، بلکہ یہ مکان بدستور والدہ کی زندگی میں ان ہی کی ملکیت ہی شمار ہوگا اور ان کے انتقال کے بعد ان کے شرعی ورثاء میں میراث کے قانون کے مطابق تقسیم ہوگا۔