سوال: میں ایک 34 سالہ بیوہ ہوں، میں نے اپنے ایک رضاعی بھائی (27 سال عمر، غیر شادی شدہ) کو گاوں سے بلا کر اپنے گھر میں رکھا ہے تاکہ گھر کی مناسب حفاظت رہے اور یہ کہ لوگوں کہ پتہ چلے کہ گھر میں ایک مرد موجود ہے اور اس طرح بری نظروں اور مجرموں سے امن ہو، میری دو بالغ بیٹاں اور بیٹا نابالغ بچہ ہے۔
اس ضمن میں میرا سوال یہ ہے کہ چونکہ معاشرے میں رضاعی رشتوں کے میل جول کا رواج نہیں ہے اس لیے کیا میرے لیے جائز ہے کہ میں اس کا تعارف سگے بھائی کے طور پر کروں؟ نیز کیا گھر کے اندر مجھے اور میری بالغ بیٹیاں (16 اور 13 سالہ) کو اس کی موجودگی میں سر کے بال کنگھی کرنا، بناو سنگار کرنا یا ننگے سر کام کاج کرنا جائز ہے؟

جواب: 1) واضح رہے کہ رضاعی بھائی کو "بھائی" کے الفاظ سے پکارنے میں کوئی حرج نہیں ہے، البتہ معاشرے میں اسے اپنے سگے بھائی کے طور پر پیش کرنا ناجائز عمل ہے، کیونکہ شریعت میں نسب تبدیل کرنے کی سخت ممانعت وارد ہوئی ہے۔
2) رضاعی بھائی چونکہ محرم ہوتا ہے، لہذا رضاعی بھائی اپنی رضاعی بہن کے ساتھ میل جول رکھ سکتا ہے، البتہ خلوت اور تنہائی میں ملاقات نہیں کرسکتا، لہذا سوال میں پوچھی گئی صورت میں صرف رضاعی بھائی کے ساتھ گھر میں رہائش اختیار کرنا درست نہیں ہے، کیونکہ اس دوران رضاعی بہن یا رضاعی بھانجیوں کے ساتھ خلوت لازم آنے کا غالب امکان ہے، جبکہ ان کے ساتھ خلوت اختیار کرنے سے اجتناب ضروری ہے۔
نیز واضح رہے کہ میل جول رکھنے کی صورت میں رضاعی بہن اور بالغ رضاعی بھانجیوں کا اس کے سامنے سر میں کنگھی کرنا، گھر کے کام کرنا اور حدود میں رہتے ہوئے زیب وزینت اختیار کرنا جائز ہے، البتہ اگر اس سے کسی فتنے کا اندیشہ ہو تو پھر اس سے پردہ کرنا ضروری ہے۔