سوال: حضرت درج ذیل مسئلے میں رہنمائی درکار ہے:
ایک ساتھی نے کہا کہ جوتے پہننے کا سنت طریقہ یہ ہے کہ بائیں پاؤں کو جوتے کے اوپر رکھا جائے اور دائیں پاؤں کو جوتے میں ڈال لیا جائے اور پھر بائیں پاؤں میں جوتا پہن لیا جائے۔
جبکہ دوسرے ساتھی نے کہا کہ یہ اس صورت میں ہے جب آپ مسجد سے نکل رہے ہوں کیونکہ مسجد سے بائیں پاؤں کو باہر نکالیں گے تو اس کو گندا ہونے سے بچانے کے لئے جوتے کے اوپر رکھ لیتے ہیں، مسجد کے علاوہ جوتا پہنتے ہوئے بائیں پاؤں کو جوتے کے اوپر رکھنے کی ضرورت نہیں ہے۔
برائے مہربانی رہنمائی فرمائیے کہ ان میں سے کس کی بات ٹھیک ہے؟

جواب: حضرت ابو ہریرہ رضی اللہ عنہ سے روایت ہے کہ رسول اللہ ﷺ نے فرمایا: ”جب تم میں سے کوئی شخص جوتا پہنے تو دائیں طرف سے شروع کرے اور جب اتارے تو بائیں طرف سے اتارے، تاکہ دایاں پاؤں پہننے میں پہلے ہو اور اتارنے میں آخری ہو“۔  (صحیح بخاری، حدیث نمبر: 5855)
مذکورہ بالا حدیث مبارکہ سے معلوم ہوا کہ جوتے پہننے کا مستحب طریقہ یہ ہے کہ جوتا پہننے والا پہلے دایاں جوتا پہنے اور پھر بایاں، لیکن اس کے لیے کوئی مخصوص صورت منقول نہیں ہے، لہذا اس کے لیے جو صورت بھی اختیار کی جائے، درست ہے خواہ بایاں پیر بائیں جوتے پر رکھے یا نہ رکھے۔