سوال: میں ایک ادارہ میں کام کرتا ہوں، میرا ڈیوٹی ٹائم چار گھنٹے ہے، اس دوران ظہر اور عصر کی نماز کا وقت بھی آجاتا ہے تو نماز پڑھنے جاتا ہوں، میں آپ سے پوچھنا یہ چاہتا ہوں کہ میں ڈیوٹی کے دوران جو فرض نمازیں پڑھنے کے لیے جاتا ہوں تو کیا مجھے ڈیوٹی کے علاوہ اتنا وقت مزید کام کرنا پڑے گا؟

جواب: نماز اللہ کا حکم اور ایک شرعی فریضہ ہے، اس وجہ سے فرض نماز، سنت موکدہ اور واجب کے بقدر وقت ملازمت سے مستثنیٰ ہوتا ہے، جیسا کہ طبعی ضروریات مثلا: کھانا پینا اور قضائے حاجت کا وقت ملازمت سے مستثنی ہوتا ہے۔
لہذا ملازمت کے اوقات میں فرض نماز، واجب اور سنت موکدہ پڑھی جاسکتی ہیں، ان میں مشغولیت کی وجہ سے بعد میں اضافی وقت دینا شرعا لازم نہیں ہے۔
البتہ دوران ملازمت نوافل ادا کرنا درست نہیں ہے، ہاں! اگر متعلقہ ادارہ/کمپنی کی طرف سے اس کی اجازت ہو تو پڑھنے میں کوئی حرج نہیں ہے۔