سوال: ہماری مسجد کے امام صاحب فرض نمازوں میں سال میں ایک مرتبہ الم سے لے کر والناس تک قرآن پڑھتے ہیں، جس میں دو سے تین ماہ کا وقت لگاتے ہیں، جس کی وجہ سے قرآت زیادہ لمبی ہو جاتی ہے، کیا امام صاحب کا اس طرح فرض نمازوں میں ایک مرتبہ قرآن کریم ختم کرنے کا عمل درست ہے؟

جواب: واضح رہے کہ فرض نمازوں میں قراءت مسنونہ کی ترتیب کی رعایت کے ساتھ نماز پڑھانا مسنون ہے، یعنی نماز فجر اور ظہر کی فرض نمازوں میں "طِوَالِ مُفَصَّل" ( سورۃ الحجرات سے سورۃ البروج تک) میں سے کسى سورت کا پڑھنا، عصر اور عشاء کی فرض نمازوں میں "اَوساط مُفَصَّل" (سورۃ البروج سے سورۃ البیّنۃ تک) میں سے کسى سورت کا پڑھنا اور مغرب کی فرض نماز میں "قِصَار مُفَصَّل" (سورۃ البیّنۃ سے سورۃ الناس تک) میں سے کسى سورت کا پڑھنا مسنون ہے، آنحضرت صلى اللہ علیہ وسلم اور صحابہ کرام رضوان اللہ علیہم اجمعین کا نمازوں میں جماعت کراتے ہوئے اکثر معمول مذکورہ بالا مسنون ترتیب سے تلاوت کرنے کا رہا ہے، لہذا فرض نمازوں میں اس مسنون ترتیب کا لحاظ رکھ کر تلاوت کرنا افضل اور زیادہ ثواب کا باعث ہے، لہذا سنت ترتیب کو مستقل طور پر ترک کر کے فرض نمازوں میں ترتیب وار قرآن کریم کى تلاوت کرنے سے اگرچہ نماز تو ہو جائے گى، لیکن ایسا کرنا مکروہ تنزیہی (خلافِ اولیٰ) ہے۔
نیز احادیث مبارکہ میں امام کو نماز پڑھاتے ہوئے مقتدیوں کی رعایت کی بہت تاکید کى گئى ہے، جبکہ اس ترتیب وار پورے قرآن کریم کى تلاوت کے سبب بعض اوقات قراءت مسنونہ کی مقدار سے زیادہ تلاوت ہوتی ہے، جس کی وجہ سے مقتدیوں کی رعایت نہیں ہو پاتی ہے، لہذا اگر مسنون مقدار سے زائد تلاوت کرنے کی وجہ سے مقتدیوں کو اذیت و پریشانى ہوتی ہو تو ایسا کرنا مکروہ تحریمى ہے، اس سے اجتناب کرنا ضروری ہے۔

ہاں! اگر امام صاحب اپنى انفرادى نماز (سنن و نوافل) میں ترتیب سے قرآن کریم کى تلاوت کرتے ہیں تو اس میں کوئى حرج نہیں ہے۔