سوال:
اگر کوئی شخص اِس نیت سے اپنے بینک اکاؤنٹ کو کرنٹ اکاؤنٹ سے سیونگ اکاؤنٹ ( کمرشل بینک ) میں کنورٹ کرے کہ اسکا جتنا سود آئیگا، وہ بینک نہ کھا سکے اور اسکے بجائے وہ یہ سود کی رقم بغیر ثواب کی نیت کے کسی مستحق تک پہنچا سکے تو کیا یہ کرنا صحیح ہے ؟
جواب: بینک منافع کے نام سے جو کچھ دیتا ہے، شرعاً وہ سود کے حکم میں ہے، اور سود لینا، دینا دونوں ناجائز اور حرام ہے، سودی معاملات کرنے والوں پر رسول اللہ ﷺ نے لعنت کی ہے، لہذا بینک کا نفع غرباء و فقراء میں تقسیم کرنے کی نیت سے سیونگ اکاؤنٹ کھلوانا درست نہیں ہے۔
کیونکہ سود کا مال جو صدقہ کرنے کو کہا جاتا ہے، وہ بغیر نیتِ ثواب کے کہا جاتا ہے، یعنی اس میں ثواب ملنے کی امید نہیں رکھنی چاہیے، چونکہ یہ سود کے مال سے چھٹکارے کی ایک صورت ہے، نہ کہ نیکی کمانے کا ذریعہ ہے، لہذا یہ نہیں کہا جاسکتا کہ پہلے آپ گناہ جان بوجھ کر کمائیں اور پھر اس گناہ سے چھٹکارا حاصل کریں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔
دلائل:
القرآن الکریم: (البقرۃ، الایة: 278- 279)
يَا أَيُّهَا الَّذِينَ آمَنُوا اتَّقُوا اللَّهَ وَذَرُوا مَا بَقِيَ مِنَ الرِّبَا إِنْ كُنْتُمْ مُؤْمِنِينَo فَإِنْ لَمْ تَفْعَلُوا فَأْذَنُوا بِحَرْبٍ مِنَ اللَّهِ وَرَسُولِهِ ۖ وَإِنْ تُبْتُمْ فَلَكُمْ رُءُوسُ أَمْوَالِكُمْ لَا تَظْلِمُونَ وَلَا تُظْلَمُونَo
صحیح مسلم: (227/2)
عن جابرؓ قال: لعن رسول اللّٰہ ﷺ اٰکل الربا وموکلہ وکاتبہ وشاہدیہ ، وقال: ہم سواء.
الدر المختار مع رد المحتار: (99/5، ط: دار الفکر)
والحاصل أنه إن علم أرباب الأموال وجب رده عليهم، وإلا فإن علم عين الحرام لا يحل له ويتصدق به بنية صاحبه
بذل المجہود: (359/1، ط: مرکز الشیخ أبي الحسن الندوي)
یجب علیہ أن یردہ إن وجد المالک وإلا ففي جمیع الصور یجب علیہ أن یتصدق بمثل ملک الأموال علی الفقراء۔
واللہ تعالٰی اعلم بالصواب
دارالافتاء الاخلاص،کراچی