سوال: محکمہ اوقاف سے مسجد کی دکان کرایہ پر لینا کیسا ہے جبکہ اس دکان کا کرایہ دیگر پرائیویٹ دکانوں کی بنسبت بہت کم ہو؟

جواب: واضح رہے کہ اوقاف کی چیزوں میں وہ امور سرانجام دیے جاسکتے ہیں، جو وقف کے حق میں مفید ہوں۔
اس اصول کی بناء پر متولی وقف کا مسجد کی دکان کو اجرت مثل (اس جیسی دکان کا اس جگہ میں عام طور پر جو کرایہ چل رہا ہو) کے عوض کرائے پر دینا اور لینا دونوں جائز ہے، لیکن متولی وقف کے لیے ایسی دکان کو اجرت مثل سے کم کرائے کے عوض دینا جائز نہیں ہے۔
البتہ اگر ایسا کرنے میں مسجد کی کوئی مصلحت ہو تو پھر اس کی گنجائش ہے، تاہم ایسی صورت میں بھی غیر معمولی طور پر کرایہ کم مقرر کرنا (جو اجرت مثل سے بہت کم ہو) شرعا درست نہیں ہے، اور اگر ایسا کیا گیا تو اجرت مثل کی حد تک کرایہ پورا کرنا متولی (نگران) کی ذمہ داری ہوگی، چاہے وہ خود سے پورا کرے یا کرایہ دار کو اس کے لیے قائل کرے۔