سوال: میں نے سنا ہے کہ لفظ آزاد کنایہ ہے، اگر شوہر کے منہ سے میں تمہیں آزاد کر رہا ہوں نکل جائے لیکن نیت اس وقت طلاق کی نہ ہو تو اس کا کیا حکم ہے؟
تنقیح: لفظِ آزاد کے صریح یا کنایہ ہونے اور اس سے طلاق کے واقع ہونے کا مدار سیاق و سباق پر ہے، لہٰذا یہ وضاحت فرمائیں کہ شوہر نے یہ جملہ کس سیاق و سباق میں اور کس نیت کے ساتھ کہا تھا؟ اس وضاحت کے بعد ہی آپ کے اس سوال کا جواب دیا جاسکتا ہے۔ جزاک اللہ خیرا
جواب تنقیح: موضوع طلاق تھا لیکن شوہر کو شروع سے معلوم ہی نہیں ہوا کہ ان الفاظ سے طلاق واقع ہو جاتی ہے یا ہو جائے گی اور اس نے طلاق کا لفظ استعمال نہ کرنے کے لیے دوسرا لفظ استعمال کیا۔ شوہر کے بقول اس کی طلاق کی نیت نہ تھی، بات میں وزن رکھنے کے لیے آزاد کا لفظ استعمال ہوا۔

جواب: جب شوہر نے بیوی سے کہا کہ "میں تمہیں آزاد کر رہا ہوں" تو اس سے ایک طلاقِ رجعی واقع ہوگئی، کیونکہ بیوی کو آزاد کرنے کے الفاظ عرف میں طلاق کے لیے استعمال ہوتے ہیں اور ان سے نیت کے بغیر بھی طلاق رجعی واقع ہوجاتی ہے، خاص طور پر جب موضوع بھی طلاق کا ہو۔
البتہ اگر اس کے علاوہ کوئی اور طلاق نہیں دی تو اس صورت میں شوہر کو عدت کے اندر رجوع کا اختیار حاصل ہوگا، اور رجوع کرنے کے بعد اس کے پاس مزید دو طلاقوں کا اختیار باقی رہے گا۔