سوال: اگر بیوی مرگی کی مریضہ ہو اور اس کی اکثر صحت خراب رہنے کی وجہ سے حاملہ ہونا مشکل اور پھر حمل اور زچگی کے مراحل سے گزرنا ڈاکٹروں کی راۓ میں اس کے لییے محال یا مہلک ہونے کا اندیشہ ہو تو کیا اس صورت میں اس کا شوہر اس کو طلاق دینے میں گنہگار ہوگا؟ جبکہ وہ اپنے شوہرکے حقوق پورے کرنے سے بھی عاجز ہو اور مرد کے لیے اس بیوی کے ہوتے ہوئے دوسری شادی کرنا محال ہو۔

جواب: سوال میں پوچھی گئی صورت میں اگر علاج کے باوجود صحت کی امید نہ ہو، جس کی وجہ سے باہمی حقوق پورے نہ ہوسکتے ہوں، تب بھی ایسی صورت میں شوہر کے لیے بہتر یہی ہے کہ اس مشکل اور آزمائش کے وقت میں صبر کرتے ہوئے بیوی کا ساتھ دے، اور جس حد تک ممکن ہو نباہ اور علاج کی کوشش کرے، اور طلاق دینے میں جلد بازی نہ کرے، نیز پہلی بیوی کے موجود ہوتے ہوئے دوسری بیوی کے حقوق ادا کر سکتا ہو تو دوسری شادی کرنے میں بھی کوئی حرج نہیں ہے۔
تاہم اگر علاج وغیرہ کے بعد بھی صحت ملنے کی امید نہ ہو تو طلاق دینے کی بھی گنجائش ہے۔