سوال: میرا شوہر ہر وقت مجھ پر شک کرتا ہے اور میری بھابھیوں کو بھی گندا سمجھتا ہے، ایک دن ہماری لڑائی ہوئی اور میرے شوہر نے کہا کہ "اگر آپ نے اپنی بھابھیوں سے واسطہ رکھا تو آپ کو میری طرف سے طلاق ہوگی، طلاق ہوگی، طلاق ہوگی، اور پھر دو ماہ بعد میں اپنے میکے گئی، اور اب مجھے یہاں دو ماہ ہوگئے ہیں۔
میرا شوہر اب کہتا ہے کہ میری نیت غلط کام میں ان کا ساتھ دینے کی تھی،
میرا سوال یہ ہے کہ کیا اگر میں اپنے میکے میں بھابھیوں سے ملتی ہوں اور بات چیت کرتی ہوں تو کیا مجھ پر طلاقیں واقع ہوگئی ہیں؟
نیز یہ بھی بتائیں کہ اگر میں کسی ایک بھابھی سے نہیں ملی اور باقیوں سے مل گئی تو کیا اس صورت میں بھی طلاق ہوجائے گی؟

جواب: پوچھی گئی صورت میں شوہر کے الفاظ "اگر آپ نے اپنی بھابھیوں سے واسطہ رکھا تو آپ کو طلاق ہوگی، طلاق ہوگی، طلاق ہوگی" سے تین طلاقیں آپ کے بھابھیوں سے واسطہ رکھنے پر معلق ہوگئی ہیں، اور واسطہ رکھنے سے عرف میں تعلق اور رابطہ رکھنا مراد ہوتا ہے، جب کہ شوہر کا کہنا ہے کہ اس نے غلط کام میں ساتھ دینے کی نیت کی تھی، یہ نیت چونکہ ظاہری الفاظ کے بھی خلاف ہے، اس كے محتملات ميں سے نہیں ہے، اور عرف سے سمجھ میں آنے والے مفہوم کے بھی خلاف ہے، نیز واسطہ رکھنا ایک فعل ہے، جو تخصیص کا سرے سے ہی احتمال نہیں رکھتا، اس لیے اس میں شوہر کی نیت کا کوئی اعتبار نہیں ہوگا۔
لہٰذا جب آپ اپنے میکے گئیں اور وہاں بھابھیوں سے بات چیت اور تعلق رہا تو ایسی صورت میں آپ پر تین طلاقیں واقع ہو کر حرمتِ مغلظہ ثابت ہوچکی ہے، تین طلاقیں دینے کی صورت میں عدت کے دوران رجوع کا حق باقی نہیں رہتا ہے، اور نہ ہی عدت گزرنے کے بعد اس شوہر سے دوبارہ نکاح ہو سکتا ہے، جب تک کسی اور مرد سے نکاح کر کے اس کے ساتھ حقوقِ زوجیت ادا نہ کرے، پھر اگر وہ طلاق دے دے یا انتقال کر جائے تو عدت گزرنے کے بعد طرفین کی رضامندی سے نئے مہر اور دو گواہوں کی موجودگی میں اسی شخص سے دوبارہ نکاح کیا جا سکتا ہے۔