سوال: ایک لڑکا اور ایک لڑکی زنا کرتے ہوئے پکڑے گئے ہیں، دونوں اپنا جرم مان رہے ہیں، اور اس کیس کے تمام گواہ بھی موجود ہیں، اب لڑکی کا شوہر اپنی بیوی کو طلاق دینا چاہتا ہے، کیا ایسی صورت میں لڑکی کو اپنے جہیز، تحائف اور مہر وغیرہ میں سے کچھ حصہ ملے گا یا نہیں؟

جواب: واضح رہے کہ زنا گناہ کبیرہ ہے، لہذا زنا کرنے والے مرد و عورت پر لازم ہے کہ اپنے اس فعل پر ندامت کے ساتھ اللہ تعالیٰ کے حضور توبہ و استغفار کریں اور آئندہ اس فعل سے بچنے کا پورا عزم کریں۔
اس کے بعد اگر شوہر چاہے تو اس عورت کو اپنے نکاح میں رکھ سکتا ہے، کیونکہ زنا کی وجہ سے عورت کو طلاق دینا شرعا لازم نہیں ہے، لیکن اگر شوہر سمجھتا ہے کہ ساتھ رہتے ہوئے حدود اللہ (میاں بیوی کے ایک دوسرے پر شرعی حقوق) قائم نہیں رہیں گے اور وہ اس کے ساتھ رہنے پر راضی نہ ہو تو اسے طلاق بھی دے سکتا ہے۔ طلاق دینے کی صورت میں عورت کو پورا مہر ملے گا، لیکن اگر شوہر بیوی کی رضامندی سے مہر کے بدلے خلع دے دے تو خلع دینے سے عورت پر طلاق بائن واقع ہوجائے گی، جس سے وہ فورا شوہر کے نکاح سے نکل جائے گی اور اسے مہر کا استحقاق بھی نہیں ہوگا۔
نیز جہیز کا سامان اور وہ تحائف جو عورت کو اس کے رشتہ داروں کی طرف سے دیے گئے ہیں، وہ چونکہ عورت کی ملکیت ہیں، لہذا دونوں صورتوں (طلاق یا خلع) میں عورت اپنے جہیز کا سامان اور تحائف اپنے ساتھ لے جاسکتی ہے۔
البتہ شوہر اور سسرال کی طرف سے ملنے والے تحائف اگر عورت کو بطور ملکیت دیے گئے ہوں تو عورت ان تحائف کی مالک ہوگی، لیکن اگر بطورِ عاریت (محض استعمال) دیے گئے ہوں تو عورت ان تحائف کی مالک نہیں ہوگی، لہذا عورت کو ان کے مطالبے کا کوئی حق حاصل نہیں ہوگا۔