عنوان: "فلاں شخص معجزانہ طور پر بچ گیا" کہنے کا حکم (10338-No)

سوال: کیا یہ کہنا درست ہے کہ فلاں شخص معجزانہ طور پر بچ گیا، جبکہ معجزہ انبیاء علیہم السلام کے ساتھ خاص ہے؟

جواب: واضح رہے کہ "معجزة" عربی زبان کا لفظ ہے، جو"عِجْزٌ" سے مأخوذ ہے، جس کے معنی بے بس اور عاجز کرنے کے آتے ہیں اور اصطلاح میں "معجزہ" ایسے خلافِ عادت کام کو کہا جاتا ہےجو مروجہ فطری قوانین اور عالم اسباب کے خلاف ہو اور اسے اللہ تعالیٰ کی جانب سے کسی نبی کی نبوت کے ثبوت کے لیے اس نبی سے ظاہر کروایا جائے ، جبکہ عام لوگ اسے سر انجام دینے سے عاجز ہوں۔
معجزے کی مذکورہ تعریف سے معلوم ہوا کہ قوانینِ فطرت اور ظاہری اسباب کے بر عکس کام کا کسی نبی کے ذریعے سے ظہور اس کی نبوت کے ثبوت کے لیے ہوتا ہے، جبکہ عام حالات میں کسی شخص کے ساتھ ظاہری اسباب کے برعکس اگر کوئی معاملہ پیش آجائے، مثلاً: کوئی شخص گاڑی کے خوفناک حادثے میں باوجود پورے اسباب ہلاکت کے زندہ سلامت محفوظ رہے تو چونکہ یہ ایسا معاملہ ہے جو عالم اسباب کے برعکس ہے، لیکن اللہ تعالیٰ نے اسبابِ ہلاکت کے باوجود اسے زندہ سلامت رکھا ہے اور اس میں انسان کا کوئی کمال نہیں ہے، لہذا ایسے موقعوں پرمجازی طور پرمحاورے میں یہ کہہ دیا جاتا ہے کہ فلاں اس حادثے میں "معجزاتی" طور پر بچ گیا ہے۔ ظاہر ہے کہ اس جملے کے ذریعے (معاذ اللہ) اس بچ جانے والے کی نبوت کا ثبوت مقصود نہیں ہوتا ہے اور نہ ہی سننے والوں کے ذہن میں اس کا اصطلاحی معنی ہوتا ہے، بلکہ اس میں محض اللہ تعالیٰ کی اس حیرت انگیز قدرت کاملہ کی طرف اشارہ کرنا مقصود ہوتا ہے کہ وہ کام عام طور پر انسانی دسترس میں نہیں تھا اور انسان اس سے عاجز تھا، لیکن اس کے باوجود اس کے ساتھ غیبی قدرت والا معاملہ ہوا ہے، لہذا اگر کوئی ایسا جملہ کہہ دے تو گناہ گار نہیں ہوگا۔

۔۔۔۔۔۔۔۔۔۔۔۔۔۔۔۔۔۔۔۔۔۔۔
دلائل:

شرح العقائد النسفية: (مبحث المعجزات و أقسام الخوارق، ص: 315، ط: مكتبة البشرى)
"هي أمر يظهر بخلاف العادة على يد مدعي النبوه عند تحدى المنكرين على وجه يعجز المنكرين عن الإتيان بمثله".

القاموس الوحيد: (مادة: عجز، ص: 1049، ادارہ اسلامیات، لاهور)

واللہ تعالیٰ اعلم بالصواب
دارالافتاء الاخلاص،کراچی

Print Full Screen Views: 621 Mar 07, 2023
"fulaan / fulaa / fulan shakhs / admi / insan muajzana toor / tor per bach gaya" kehne ka hokom /hokum

Find here answers of your daily concerns or questions about daily life according to Islam and Sharia. This category covers your asking about the category of Beliefs

Managed by: Hamariweb.com / Islamuna.com

Copyright © Al-Ikhalsonline 2024.