سوال: ہم تین بھائی ہیں والدین کا انتقال ہوچکا ہے، وراثت میں ایک فلیٹ اور زیورات ہیں، دو بھائی شادی شدہ ہیں، جبکہ ایک کنوارہ بھائی اس فلیٹ میں رہتا تھا، 2006 سے بجلی، پانی، گیس فلیٹ کے سارے اخراجات دونوں شادی شدہ بھائی ادا کرتے تھے، پچھلے سال 2022 میں کنوارے بھائی نے ہم دو بھائیوں کی اجازت کے بغیر وہ فلیٹ پندرہ لاکھ کا بیچ دیا ہے اور ہم دونوں بھائیوں کو 65000 روپے دیے ہیں۔ سوال یہ ہے کہ کیا ہم باقی دو بھائی زیورات میں سے فلیٹ اور زیور میں اپنا جو حصہ بنتا ہے، وہ لے سکتے ہیں؟

جواب: واضح رہے کہ وراثت ایک شرعی حق ہے، جس میں تمام ورثاء اپنے شرعی حصوں کے مطابق حق دار ہوتے ہیں، کسی بھی وارث کے لیے دیگر ورثاء کی اجازت کے بغیر مشترکہ ترکہ کو فروخت کرنا جائز نہیں ہے۔
لہذا پوچھی گئی صورت میں اگر واقعتا فلیٹ پندرہ لاکھ کا فروخت ہوا ہو اور کنوارے بھائی نے مکمل رقم ورثاء میں صحیح تقسیم نہ کی ہو تو اس پر لازم ہے کہ اپنا حصہ رکھ کر باقی زائد رقم شرعی تناسب سے ورثاء میں تقسیم کر دے، ورنہ آخرت میں سخت عذاب ہوگا۔
لیکن اگر وہ بقیہ رقم تقسیم کرنے پر راضی نہ ہو تو باقی ورثاء زیور میں سے اپنے (فلیٹ اور زیور کے) حصے کے بقدر لے سکتے ہیں۔