سوال: مفتی صاحب! اس حدیث کی تصدیق فرمادیں: حضرت ام حبیبہؓ روایت کرتی ہیں کہ جناب رسول اللہ ﷺ نےارشاد فرمایا: جو شخص دن رات میں بارہ رکعتیں ادا کرے، اس کے لیے جنت میں ایک گھر بنایا جائے گا، چار رکعتیں ظہر سے پہلے، دو ظہر کے بعد، دو مغرب کے بعد، دو رکعتیں عشاء کے بعد، دو رکعتیں فجر کی نماز سے پہلے۔ (سنن ترمذی،حدیث نمبر: 415)

جواب: سوال میں ذکرکردہ روایت ’’حسن صحیح ‘‘ہے،لہذا اس کو بیان کیاجاسکتا ہے۔
ذیل میں اس روایت کاترجمہ اور اسنادی حیثیت ذکرکی جاتی ہے:
ترجمہ:حضرت ام حبیبہ رضی اللہ عنہا روایت کرتی ہیں کہ جناب رسول اللہ ﷺ نےارشاد فرمایا :جو شخص دن رات میں بارہ رکعتیں ادا کرے، اس کے لیے جنت میں ایک گھر بنایا جائے گا چار رکعتیں ظہر سے پہلے ،دو ظہر کے بعد ،دو مغرب کے بعد، دو رکعتیں عشاء کے بعد ، دو رکعتیں فجر کی نماز سے پہلے جو نماز ہے اول روز کی ۔(سنن ترمذی،حدیث نمبر: 415)
تخریج الحدیث:
۱۔اس حدیث کو امام ترمذی(م279ھ)نے’’سنن الترمذی‘‘(2/274،رقم الحديث:415،ط: شركة مكتبة مصطفى البابي الحلبي) میں ذکرکیا ہے۔
۲۔امام اسحاق بن راہويہ(م230ھ)نے’’مسند اسحاق بن راھویہ‘‘(4/234،رقم الحديث:2942،ط:مكتبة الإيمان)میں ذکرکیا ہے۔
۳۔امام مسلم (م261ھ)نے’’صحیح مسلم‘‘(1/502،رقم الحديث:728،ط:دارإحياء التراث العربي)میں اختصار کے ساتھ میں ذکرکیا ہے۔
۴۔امام ابن ماجہ (م273ھ)نے’’سنن ابن ماجۃ‘‘(1/361،رقم الحديث:1141،ط:دارإحياء الكتب العربي)میں اختصار کے ساتھ میں ذکرکیا ہے۔
۵۔امام نسائی(م303ھ)نے’’سنن النسائی‘‘(3/262،رقم الحديث:1802،ط:مكتب المطبوعات الإسلامية)میں ذکرکیا ہے۔
مذکورہ روایت کی اسنادی حیثیت:
امام ترمذی(م279ھ)فرماتے ہیں عنبسہ کی ام حبیبہ سے مروی حدیث اس باب میں حسن صحیح ہے ۔