سوال: کیا قیامت کے دن مسلمان اللہ پاک کا دیدار کرپائیں گے اور کیا ہمیں اس دیدار کے لیے دعا کرنی چاہیے؟

جواب: واضح رہے کہ قیامت کے دن ایمان والے اللہ تعالیٰ کا دیدار کریں گے اور کفار و مشرکین اللّٰہ تعالیٰ کے دیدار سے محروم رہیں گے، نیز اہلِ ایمان آخرت کى نعمتوں میں سے جس نعمت سے سب سے زیادہ لطف اندوز ہوں گے، وہ اللہ تعالى کا دیدار ہے، اس بات کو اللہ تعالى نے قرآن کریم میں مؤمنین کے خصوصى امتیاز کے طور پر بیان فرمایا ہے:
ارشاد بارى تعالى ہے: "اس دن بہت سے چہرے شاداب ہوں گے، اپنے پروردگار کى طرف دیکھ رہے ہوں گے"۔ (سورہ قیامہ: آیت نمبر: 22-23)
تشریح:
مؤمنوں کو جنت میں اللہ تعالى کا دیدار نصیب ہوگا جو جنت کى تمام دوسرى نعمتوں سے بڑى نعمت ہوگى۔ (آسان ترجمہ قرآن: ص 1152)
لہذا اللہ تعالى کے دیدار کی لذت کے حصول کے لیے دعا کرنا نہ صرف جائز ہے، بلکہ آنحضرت صلى اللہ علیہ وسلم نے اللہ تعالى کے دیدار کى لذت کے حاصل ہونے کى دعا بھی تعلیم فرمائى ہے، آپ صلى اللہ علیہ وسلم کى ایک جامع دعا میں یہ الفاظ منقول ہیں: "أسألك لذة النظر إلى وجهك، والشوق إلى لقائك". (اے اللہ! میں تجھ سے تیرے دیدار کی لذت اور تیری ملاقات کے شوق کا سوال کرتا ہوں) (سنن نسائی، حدیث نمبر:1305)