سوال: یہ سنا ہے کہ جب تک بچے کا عقیقہ نہ کر لیا جائے تب تک بچے کے ساتھ مصائب لگے رہتی ہیں۔ کیا یہ بات درست ہے اور کیا عقیقہ کرنا ضروری ہے؟

جواب: جى ہاں! عقیقہ کے فضائل اور فوائد میں سے یہ بات بھى احادیث مبارکہ سے ثابت ہے کہ نو مولود بچے کا جب تک عقیقہ نہ ہو جائے، تو اس وقت تک وہ بچہ آفات اور بلاؤں کے خطرے میں ہوتا ہے۔
چنانچہ حدیث مبارکہ میں آپ ﷺ کا ارشاد مبارک ہے۔
ترجمہ: "حضرت سلمان بن عامر الضبی رضی اللہ عنہ روایت کرتے ہیں کہ میں نے رسول اللہ صلى اللہ علیہ وسلم کو یہ فرماتے ہوئے سنا: "لڑکےکے ساتھ عقیقہ ہے"(یعنى بچے کا عقیقہ تو ہونا ہى چاہیے، اس پر بلائیں زیادہ آتى ہیں اور عقیقہ سے بلائیں ٹلتى ہیں)، "پس تم اس کى طرف سے خون بہاؤ" (عقیقہ میں اصل جانور ذبح کرنا ہے، پھر دعوت کرنا یا گوشت تقسیم کرنا یکساں ہے) "اور اس سے تکلیف دہ چیز دور کرو"، (یعنى سر کے بال، ہاتھ پاؤں کے ناخن کاٹو اور بچہ تندرست ہو تو ختنہ کرا دو)۔
(صحیح بخاری: حدیث نمبر: 5472)
(ترجمہ وتشریح از "تحفۃ القارى شرح صحیح البخارى" جلد 10 ص 389، طبع: زمزم پبلشرز، کراچى)
شیح الحدیث مولانا محمد زکریا کاندھلوى رحمۃ اللہ علیہ (م 1402 ھ) نے "الأبواب والتراجم" جلد 6 ص 39 میں مذکورہ بالا حدیث میں بچے سے تکلیف دہ چیز دور کرنے کا مفہوم یہ بیان فرمایا ہے کہ اس سے مراد وہ تکلیف دہ بلائیں ہیں، جو بچے کو پیش آ سکتى ہیں، لہذا عقیقہ کر کے اس بچے سے ان بلاؤں اور آفات کو دور کر دو، جیسا کہ ملا على قارى رحمۃ اللہ علیہ (م 1014 ھ) نے آنحضرت صلى اللہ علیہ وسلم کے ارشاد "الغلام مرتهن بعقيقته" (ہر بچہ اپنے عقیقہ کے جانور کے عوض رہن (گروى) ہوتا ہے) کا یہى مفہوم بیان فرمایا ہے کہ بچے کى آفات سے سلامتى اس کے عقیقہ کے عوض محبوس ہوتى ہے۔
مزید اس بارے میں ارشاد نبوى صلى الله عليہ وسلم ہے۔
ترجمہ: "حضرت حسن بصرى رحمۃ اللہ علیہ نے حضرت سمرۃ بن جندب رضی اللہ عنہ سے روایت کیا ہے کہ رسول اللہ صلى اللہ علیہ وسلم نے فرمایا: "ہر بچہ اپنے عقیقہ کے جانور کے عوض رہن (گروى) ہوتا ہے، جو ساتویں دن اس کى طرف سے قربانى کیا جائے اور اس کا سر منڈوا دیا جائے اور نام رکھا جائے".
(سنن ترمذی: حدیث نمبر: 1522)
محدث کبیر حضرت مفتى سعید احمد پالنپورى رحمۃ اللہ علیہ (م 1441 ھ) نے "تحفۃ الالمعی شرح ترمذی" اس حدیث کے ترجمہ و تشریح میں فرمایا ہے: "لڑکا گروى رکھا ہوا ہے عقیقہ کے بدلے میں، یعنى آفات میں محبوس ہے۔۔۔ وہ عقیقہ کے ذریعے چھڑایا جائے، یعنى عقیقہ اس کا فدیہ بن جاتا ہے اور وہ آفات سے بچ جاتا ہے۔۔۔ جب تک بچہ کا عقیقہ نہ کیا جائے، وہ معرض آفات میں رہتا ہے اور عقیقہ فدیہ بن جاتا ہے، اس سے بچے کى بلائیں دور ہوتى ہیں اور لڑکے پر چونکہ بلائیں زیادہ آتى ہیں، اس لیے اس کا دو بکروں کا عقیقہ مسنون ہےاور لڑکى پر بلائیں نسبتا کم آتى ہیں، اس لیے اس کى طرف سے ایک بکرى کافى ہے".
(تحفۃ الالمعی شرح سنن الترمذی: جلد 4 ص 452، ط: زمزم پبلشرز،کراچى)
نیز واضح رہے کہ بچے کى پیدائش پر عقیقہ کرنا مستحب ہے، فرض یا واجب نہیں ہے، لہذا اگر کسى کے پاس استطاعت نہ ہو، تو اس پر عقیقہ کرنا لازم نہیں ہے اور جس کے پاس مالى وسعت ہو، تو اسے عقیقہ کرنا چاہیے، احادیث مبارکہ میں اس بات کى بہت ترغیب آئی ہے۔